vulmawi.com

Gov`t College Lu-ngleiin Badge dum bel

2012-02-02T22:34:00.002+05:30

Mizoram College Teacher Association (MCTA) chuan Mizoram puma MCTA te chu ni-min a\anga Badge dum bel tura an tih angin Lunglei Gov`t College-ah pawh Zirtirtuten Badge dum an bel tih R.Lalrochama Lunglei Gov`t College Tea-cher Association Secretary chuan a sawi.

Hetianga Badge dum an bel chhan hi Pay arrear release tura an ngenna a ni a, sawrkarin January thla chhunga tihhlawhtlinsak a intiam laia an intiam chhu-nga a hlawhtlinna an hmuh loh avanga an College-in Badge dum bel ve an nih thu a sawi.

Lunglei PWD Engineer siksawi an ni.

2012-02-02T22:33:00.003+05:30

Tun hnai mai khan Mi-zoram sawrkar chuan PWD hnuaia AE/SDO 58 zette awmna a siksawi a, Lunglei District chhunga mite pawh an che nual. Lunglei Building Division hnuaia AE/SDO 4-te phei chu an vaiin sawn chhuah vek an ni.

Er. R. Lalzidinga, SDO, Building Sub-Division-I chu Er. David Lal\anpuia'n a thlak ang a, R.Lalzidinga hi Aizawl Road North Sub-Division-ah a awm ang.

Er. F. Lalramenga, SDO, Building Sub-Division-II chu Er. Lalnuntluanga'n a thlak ang a, F.Lalramenga hi Lunglei Road Sub-Division ah a awm ang.

Er. V. John, Saiha Buil-ding Sub-Division chu Er. Zarzoliana'n a thlak ang a, V. John hi Lawngtlai Road Sub-Division ah a awm ang.

Er. K. Vanlalliana, AE (Tech), Building Division chu Saiha Road Sub-Div-ah a phei ang a, a hmunah Er. Joel Solo a awm ang. Anni bakah hian Er. PC Chhiarkima, SDO, Lunglei Road Sub-Div. chu Saitual Sub-Division ah sawn a ni a, Er. Samuel Ramdinthara, SDO, Quality Control Sub-Division, Lunglei pawh Er. V. Lalhmunmawia'n a rawn thlak ang. AE/SDO transfer 58-te hi February ni 10 hmaa an awmna hmun tura awm vek tura hriattir an ni.

Saihaa In haltu a inpuang

2012-02-02T22:33:00.000+05:30

Nizan dar 10 vel khan Saiha (Sobji Bazar land) New Colony leh Saiha Vengpui inrinaah In 32, chhungkaw 57, mihring 161 a\anga 180 inkar khawsakna a kangral vek a, thi an awm lo.In kangin a man 10 \hiah ngai a awm bawk.

Kangmei tichhuaktu Vanlaltlina hian a In luahna man ba a pek theih loh ava-nga hal a nih thu Police hnenah a inpuang tawh a, a hma pawhin vawi tam tak \henawm khawvengte hnenah In hal tumin a lo vau tawh \hin a, "Mombati hi a duh duha awm turin ka chhuahsan e,’ a ti.Bungrua kang chhe zat hlut zawng hi nuai 781, sing 6 leh sang 5 a chhut a ni.In kang tate luah lailawk turin New Market Bazarah chhungkaw khat tan, In 18’’X 24’’ a zau sak tura ruahman a ni bawk. Hliam pathum an awm a chungte chu mipa puitling pahnih Zonunsanga,Aizawl Tlangnuam, Fire Department a thawk lai, Hrongia, New Colony Saiha leh mipa naupang pakhat Dennis S/o Sangpuia, Saiha Bazar te an ni

In kang te hi Assam type deuh vek a ni a,kawngpui a\anga thlang deuh a nih avangin kang\helh Motor tan pawh chet a harsa hle niin an sawi.

Kangmei tuarte \anpui nan cheng sing 1 \heuh leh blanket pek a nih tur thu DC chuan a puang.

VC leh AMC chuh turte hming pek luh hun tawp ta

2012-02-01T22:39:00.000+05:30

Seat 2118 awmna Village Council 510 leh seat 524 awmna Aizawl Municipal Council hnuaia Local Council 82 inthlannaa chuh tumte hming pek luh hun vawiin khan a tawp a, rorel lai Congress leh MNF te an inbei ber tura ngaih a ni.

Vawiina hming pekluh te VC tina Returning officer ten DC-ah thehlutin naktukah endik a ni anga, hetihlai hian inhnukdawk duh te tan naktip thleng hun a ni.

Dist 6-a VC inthlanna neih turah hian, rorellai Congress party chu a mal din deuh vek ni a hriat a ni a, hetihlai hian MNF leh ZNP thawhdunna sawi tur a awm nual a, Kolasib Vengthar VC seat 7 awmnaah MNF, ZNP leh PC an thawkho dawn ni a sawi a ni a, hriat theih chinah hei hi party 3 thawhhona awmchhun a la ni rih a ni.

Chief Minister bial Serchhipah chuan Serchhip 1 leh Thenzawl VC 3-ah MNF leh ZNF thawkho in, hmun dangah erawh Congress lehMNF an inmal beih dawn ni a hriat a ni.

Lunglei khaw chhung bikah MNF leh PC Party te Electric vengah an thawkho dawn a, Electric vengah hian PC in seat hnih leh MNF ten Seat 5 an chuh ang a, hetihlai hian Serkawnah MNF leh MPC te an thawkho thung dawn a, MPC hian seat 1 an chang ang. Hriat theih chinah PC Party hi Ralvawngah MNF nen an thawkho bawk ang. Lungleiah hian Party tin te an maldin deuh vek dawn a, he Dist-ah hian Village Council 139 a awm a, amaherawhchu Dampui khua chu Wildlife sanctuary atana ruahman anih avangin inthlan ve a ni lo ang a, VC 138-ah an in thlang dawn ta a ni.

Mamit dist chhungah khawper hrang hrangah independent-a ding tur sawi tur an awm nual a, amaherawhchu Congress leh MNF inbei ber tura ngaih an ni a, Champhaiah pawh thawhhona sawi tur a tam lo a ni.

Aizawl Municipal Council hnuaia Local Council inthlannaa party hrang hrang te thawhho dan tur hriat chian theih la ni lo mahse, MNF leh ZNP thawhhona sawi tur a awm nual tawh a, hetihlai hian rorellai Congress party erawh an mal din deuh vek dawn ni a hriat a ni.

Hetihlai hian, inthlanna atana campaign pawh tan a ni tawh a, candidate ten mahni theih angin, intinah lut lawrin vote an zawng mek a, amaherawhchu thawm nei khawpa campaign hriat tur erawh a awm rih lo a ni.

Gas harsatna sukiang turin hmâ a la mêk

2012-02-01T20:29:00.001+05:30

Mizorama eirawngbawlna gas harsatna sukiang turin sorkarin hma a la mek a, eirawngbawlna gas lakna hmunpui 1 Borkhola atanga gas pekchhuah harsat chhan en turin naktukah Supply Dept hotute tirh an ni dawn.

Eirawngbawlna gas harsatna chungchangah hian Food Civil supplies and Consumer affairs Dept, Legal Metrology hotute te leh LPG Distributors te vawiin khan Supply Minister H.Rohluna hovin Aizawla a office ah an thukhawm a, hemi hnua thuchhuah siama an tarlan danin gas harsatna chhan ber hi nikum kumtawpa Guwahati Oil Refinery a kangmei chhuah avanga hun engemaw chen khar a nih vang leh hnathawkte nawrh vang anih thu an sawi a ni.

Hetihlai hian Guwahati Oil Refinery hian eirawngbawlna Gas a pe chhuak leh tawh a, gas Supply pawh karleh atang chuan a pangngai leh thei tura beisei ani tih an thuchhuahah chuan an tarlang a, Meeting hian gas hralh ruk leh tihchingpen te dap chhuaka, a tam thei ang ber phur chhuak tura tanlak nise an ti a ni.

Eirawngbawlna Gas harsatna belhchhah tu hi Mizoram hunpui Krismas leh Kumthar hman liam taka Kohhran hrang hrang ten Commercial gas nilo, gas pangngai an hman vang a ni a, hunpui chhung hian Aizawla kohhran hrang hrang hnenah gas bur 4040 pek chhuah a ni a, Khatla leh Mission vengthlang Presbyterian kohhran chauhin Commercial Gas an hmang ni a thudawn a ni.

Lunglei DC Conf. Hall-ah CPGR And Monitoring System Training

2012-01-31T23:55:00.000+05:30

Vawiin chawhma dar 10:00 khan Lunglei DC Conference Hall ah Office zawng zawng leh Computer Operator ten Centralised Public Grievances Redressal and Monitoring System training an hmang.

He Training hi NIC Aizawl leh ICT Aizawl a miten an hmanpui.He training hi Web base niin February 2012 thla laihawl vel hian launch hman tum a ni a, he Centralised Public Grievances Redressal and Monitoring System awmzia chu mipuiten eng Deptt-ah pawh sawisel tur leh lungawilohna an neih chuan complain a thehluh theih dawn a ni.

Website launch hun-ah chuan mipuiaw.nic.in tih a ni ang a, Department tinah nodal officer an awm vek bawk ang.

Complaint thehluh dawn hian mahni document fel taka ziak tur a ni a, form a awmsa vek bawk a, hming dik tak, address kimchang chiang tak leh phone No. te ziak vek tur a ni.

Complaint hi a complaint na department ten an chhang ngei ngei tur a ni a, an chhang duh lo a nih chuan DC hnenah a zualko thei dawn bawk a ni. Complaint tu hian mi-dangin a hming leh nihna an hriatsak a duh loh chuan password an nei vek ang a, officer in a khawih hman dawn lo a nih emaw a thiam tawk lo a nih chuan mipakhat (an staff te) hnenah a user ID leh password a hrilh thei ang.

Uangthuang a complaint mai mai chi a ni dawn lo va, chutiang a awm a nih chuan anmahni zawn chhuah a ni ang a, dan anga hrem theih a ni ang. Hei hi good governance cell, DP&AR Government of Mizoram bul-tum a ni ang, an monitor bawk ang.

March ni 2. 2012 ral hmain District tinah training neih vek tur a ni ang, complaint a submit hi eng chen nge a thlen tawh a concerned department ah a thleng tawh em?tih te leh process a ni em tih te a en theih anga, a print chhuah theih bawk ang.

He training hi India ram state 3 ah an kalpui tawh a, a palina atan Mizoramah hmalak mek a ni.

Lungleiah Tui Bill tihsan a ni ve tawh dâwn

2012-01-31T23:52:00.002+05:30

Lalzawmliana EE PHE Lunglei chuan Gov`t of Mizoram Notification No. G-25022/1/2008-PHE Dated 10.June.2011 angin PHE Tui Bill hetiang hian tihsan a ni dawn tih a sawi a, hei hi December ni 1.2011 atanga hman \an tur a nih thu a sawi.

(1) Tui Connection pakhatah Litre 5000 chin thlakhatah Rs.100 a ni anga, Litre 5000 chin chunglam Litre 10000 pel lo a nih chuan Litre 10000 zelah Rs.30 bill belh a ni ang, (2) Litre 10000 chunglam Litre 20000 thleng chu Litre 1000 zelah Rs. 60 a ni ang, (3) Litre 30000 chunglam a nih chuan Litre 1000 zelah Rs.70 a ni ang, a ti.

EE Lalzawmliana chuan Connection pakhat hi chhungkaw pakhat hman tur a ni a, In luahte kep phal a ni lo, Connection la duhte tan Form lain Office-ah tih fel theih reng a nih thu a sawi bawk.

Thuamluaia mualah grass phah ṭan ta

2012-01-31T23:48:00.001+05:30

Thuamluaia Muala Grass phah hna chu niminah tan a ni ta a, vawiinah mual chanve an phah hman a, naktukah a phah hrim hrim chu an zo hman ang.

Thawktute chuan Grass phah laia an phahna bula lo tei vak an awm chu an buai phah thu an sawi a, Grass phah en duhte chu Mual ko a\anga en turin an ngen a, LDSC lamin mipui thuawih lo venhim nan Mike in-chhawpin an au reng a, hei hian mipui a veng tha hle.Thawktute chuan vawiin a\anga chhiara ni 10 chhunga zawh fel theih an inbeisei.

VC leh LC inthlana tih tur leh tih loh tur

2012-01-30T22:52:00.000+05:30

Thlaleh ni 23-a Village Council leh Local Council inthlan neih tur tih tur leh tih loh tur hrang hrang hriattirna vawiin khan State Election Commission-in a chhuah leh a, inthlan Presiding Officer, Candidate, Election agent, Polling agent leh voterchu polling station chhung a mobile hman a khap a, a ri chhuak lova dah ringawt pawh phal a ni lova Counting agent te leh ziaka phalna neite tan pawh counting hall chhungah mobile lakluh khap a ni.

Hetihlai hian, Returning officer, Observer, Counting offiicial leh Security personnel te erawh chu mobile ri chhuak lova daha an kawl phal sak an ni a, Polling Station leh Counting Hall chhunga meizuk khap a ni bawk.

SEC chuan, Supreme Court thupek leh Election Commission of India-in inthlan chungchanga in kaihhruaina a siam bawhzuiin inthlan hma ni 21 tlai dar 4:00 atanga 23.2.2012 tlai dar 4 thleng, chanchinbu leh electronic media hmanga opinion poll/exit poll chungchang mipui hmaa puanzar a khap bawk a ni.

Electric hrui chatin a vawhlum

2012-01-30T19:08:00.002+05:30

Vawiin khan C. Zoremthanga (65) s/o Siamsanga, Mualthuam ‘N’ khua chu Mualthuam ram, Tlengrel rama a lo vah naah a thingkihin 132 KV Line Mualthuam leh Serte inkar hrui vawchatin Electric hrui hian amah hi a vua a, a kanghlum nghal.

A lo vahna hi ramro tak a nih avangin amah bakah ram pawh a tikang nghal a, a ruang hi a kang chhe hle a ni awm e. Ramkang hi YMA ten thelh nghalin a ruang hi zaninah tlaivar pui ani ang a, naktukah vui a ni ang.

C. Zoremthanga hian fa 4 neiin pakhat a thi tawh a, a nupui leh a fate hmeichhia hlir 3 chu a kalsan a ni.

National Highway Division IV-in Office nei ve ta

2012-01-30T19:06:00.003+05:30

PWD hnuaia National Highway Division IV te chu hun rei tak chhung Aizawlah office mumal pawh nei lova an teikual hnuin vawiin ni 30.01.2012 atang hian Chuaubuangi Building, Bazar Vengah an office tan ta.

Anni hi an EE, Er. Lalchhuana leh a SDO pahnihte nena NH-54 enkawl tur an ni a, Sailiamkawn (Serchhip daia Thenzawl peng) to Thingfal bakah Hrangchalkawn to AOC te an enkawl ang. SDO pakhat zawk Er. Zarzoliana (Zartea) hi Hnahthialah a inbun a, SDO pakhat dang Er. ZD Laltlanzova (Zotea) leh EE te hi Lungleiah office neiin an thu thung dawn a ni.

2012 VC election District Level Standing Committee thukhawm

2012-01-30T19:06:00.000+05:30

Lunglei 30th January, 2012 : Vawiin chawhma dar 11:00 khan DC Lunglei Office chamber ah 2012 VC election atan a din District Level Standing Committee member te an thukhawm a, metting ah hian Lunglei DC leh Dist. election officer nibawk Pu V.Sapchhunga, IAS chuan Jan.17 ah SEC leh sawrkar official te in hmukhawm in a rel te sawi hmasa in Lunglei Dist. ah VC inthlan thianghlim leh felfai taka kalpui a nih theih nan committee member te nen ruahmanna an siam a : Metting zawh ah hian DC chuan chanchinbu mite kawm nghalin election chungchanga hriattur pawimawh te a hrilh nghal.

Dist. Level Stangding Commt. chuan Dist. mipui te chu election felfai a awm theih nan thawhpui ah a sawm a, tlawmngai pawl zing a lianber YMA hnenah puihna a dilnghal bawk.

Tun inthlan loawm turah hian EPIC hman anih turthu leh MLTP Act. khau taka kalpui a nih tur thu Comtt. thu chhuak chuan a tarlang a, Polling Booth leh Counting Hall ah meizu leh mobile Phone hman SEC in a khap thu sawiin Election Camp pawh pakhat chiah party ten VC an in tawm turthu a tanglang a, election 2012 ah hian a vawikhat na a tan SEC chuan Vote thlak tawh chhin chhiah nan Indelible Ink Voters kut zung chal ah hnawih turin thu chhuah a siam ani. Commttee chuan SEC thuchhuah angin Media, Party mi leh mi tupawh party fakna leh sawimawina rawngkai thil tarlang lo tur leh TV ah te ti chhuak lo turin hriattirna a siam nghal.

Report-a a tarlan danin Lunglei Dist. ah haian Village Council 138 a awm mek a ni.

Ruang pakhat chhar a ni

2012-01-29T21:12:00.004+05:30

Lawngtlai Forest Complex chhungah tukin khawvar hma khan ruang pakhat chhar a ni a, he ruang hi Lawngtlai College venga cheng Lalnghenchhana Kum 21 a ni tih finfiah nghal a ni.

Lalnghenchhana hi nimin tlai khan Forest Complex chhung a thingkungah a lawn a, nizan dar 9:30 vel ah a thiante pahnih lui kal hawin Thingkunga a awm hi an hmu a, an hawsan a, tukin dar 4 vel khan tuichawi tura kal mi 1 in a ruang hi hmu a ni.

Lalnghenchhana hi a lawnna thing atanga tla ni a rin a ni a, mit a hmutute sawidan chuan a lawnna thing hi a sang hle a, a taksa ah hian pawnlam atanga hmuh maitheih hliam lian tham a awm lova, a tukhum a duk a, a ka leh hnar ah te thi a chhuak bawk. Lalnghenchhana ruang hi vawiin hian College veng thlanmuala ah

vuiliam nghal a ni.

Kawng chhinga leh Power chhia an ngaimawh

2012-01-29T21:12:00.002+05:30

Lunglei Dist.Hqrs. MJA-in Mizoramin phai lam atanga power a lakluhna kawnga chhe thei ven hna fur thlen hma ngeiin siam ni se tih resolution siamin an pass.

An resolution-ah hian Lunglei Town-a kawngpui chhia siamna tur atana sum ruahman awm vek tawh tun thlenga pek chhuah a la ni lo chu sorkarin a ranglam a pe chhuak tur leh tun Working season chhung ngei a hnathawh theih nan pekchhuah ni se tih a tel a ni.

Naute Kg 6 a hring!

2012-01-29T15:52:00.001+05:30

Nimin (Jan 28, 2012) khan Aizawl Civil Hospital-ah naute mipa kg 6 a rit a piang. Hospital-a Doctor-te hnen atanga thudawn danin he naute hi zaichhuah a ni a, a nu hi Laltlanfeli (30) Ramhlun North-a Lalpianruala nupui a ni a, Hosptital Doctor-te chuan Mizorama naupiang lian ber a tling phak niin an sawi.

Gas hralhruk thin an veng

2012-01-28T23:49:00.000+05:30

Khamrang Branch YMA chuan tunlai hian Mualkhang Gas Bottling Plant atanga eirawngbawlna gas phurhchhuah tawh, kawng laka lirthei khalhtu ten an hralhruk thin ven hna an thawk thin a, hemi avang hian dan kalha gas lei tum engemawzat an kir leh nia thudawn a ni.

Nimin tlaia YMA hnatlanga kal chhuak te chuan Aizawl Edenthar mi 2, driver te hralh lei sak tuma Gas Bur ruak 50 rawn keng te chu thil diklo a nih dan hrilhfiahin an haw tir a; Kawnpui atanga kal Bur ruak 120 neitute pawh YMA Duty avang hian an haw leh a ni. YMA hruaitute chuan kawng dunga Gas lei tumte avangin mi tam takin dan kalhin Gas an zuar a; a leina man an tisang tial tial a; tunah hian Bur khat Rs 650 velin lei a ngai tawh a; hei hi mipuiin an tuar hle a ni tih an sawi.

Motor phur khat atangin driver ten bur 20 atanga 30 te an hralhchhuak a; chu chu bur dang atanga lachhuak thenin an tikhat leh a; mipui bumna tenawm tak anih avangin Dan lova lei tumte chu do zel an tum tih an sawi.

Nimina YMA an duty tih thawm hriat a nih avang hian Aizawl atanga Gas bur ruak phurtu motor (207 pick up) 3 chu Khamrang YMA huam chin piah lam Sairang khaw bulhnaiah an ding a; anni hian Bur ruak 160 vel an phur a; hei bakah hian motor dang hmanga Gas lei tum an awm nual bawk.

Hetihlai hian Mamit Chhim Veng V/C huamchhunga Eirawngbawlna Gas semchhuah chu a leitut’en an buk a, a tlinglo nasa hle tih an hmuchhuak. Mamit khawpui chhung hmun hrang hrangah Eirawngbawlna gas vawiin khan sem a ni a, Mamit Chhim Veng V/C huamchhunga Hmunsam Venga Consumer te chuan Gas an lak hnu hian an buk hlawm a, buk tlinglo a tam hle niin an sawi a. Mipuite hian an sem hma hian buk an duh thu an sawi a, MIZOFED a thawktu ten buk a nih hnuah buk tlinglo te chu an semchhuah theih loh tur thu an sawi ve thung a. Mipui ten Gas an mamawhna a san em avangin la lo thei lo ah an inngai a, Gas man an pek vek hnuin an gas lakte chu an buk ta chauh a ni. Mamit Hmunsam ah hian Gas Bur 70 semchhuah a ni a, Kg. 28 leh 30 inkar bur 10 vel chauh a awm a, a tam zawk chu kg 25 leh 27 inkar a ni hlawm niin an sawi.

Truck leh Bike insuah Bike khalhtu a thi

2012-01-27T21:26:00.002+05:30

Tukin dar 9 leh a chanve vel khan Thenzawl leh Buangpui inkarah Truck 1 leh bike an in su a, a hmunah bike khalhtu Lalduhawma kum 32 Thenzawl khua chu a hliam tuar lovin a thi.
Mita hmutute sawi danin Truck hi Thenzawl atanga Lunglei pana tlan a ni a, a tawk zawnga bike chak taka tlan nen kawng kawia an inpelh laiin bike khalhtu hian thunun zo lovin Truck hi a su a ni.

Mizoramah Lok Adalat tihtawp rih a ni

2012-01-27T21:10:00.000+05:30

     Court-a thleng kher lova thubuai ngaihtuahna chi 1, Lok Adalat Mizoramah tihtawp rih a ni a, thubuai lut a tlem nia hriat a nih avangin nikum kumtawp khan tihtawp a ni.
    Kum 2010-11-a Court Lok Adalat kalpui a nih chhungin Mizoram pumah thubuai 296 lutin, heng zinga 44 te chu chinfel a ni a, thubuai kaihhnawiha mi hrang hrang pawisa chawitir zat chu cheng 416,812 a ni.
    Lok Adalat a thubuai ngaihtuah zinga 81 chu Court pangngai a ngaihtuah tawh Lok Adalat a sawina duh leh tak avanga sawn a ni a, thubuai zinga 42 te chu Lok Adalat-a thehluh liau liau a ni thung a ni.

Ngawi rengin minute 2 din tur

2012-01-27T21:07:00.002+05:30

India zalenna a sual laia nun chan te hriatreng nan karleh Thawhtanni khian ram pumah Martyr’s Day hman a ni dawn a, Mizoram sorkar chuan he mi ni pual hian Thawhtanni chawhma dar 10:59 - 11:00 inkarah Siren a ti ri dawn a, hna kal lai zawng zawng dahtha in ngawi rengin minute 2 chhung din tur a ni a, Minute 2 a ral tih hriattir nan Siren hi dar 11:02 leh 11:03 inkarah tihrik a ni leh dawn a, hei hi Aizawl khawpui chhung vengtina Local Council aurinna hmanga puang darh turin Mizoram sorkar chuan a ngen a ni.
District dangah chuan Martyr’s Day hman dan tur ruahmanna hi DC theuh te kutah dah niin Sub Division, Block leh Village Level Office zawng zawngah pawh he hun hi hmang ve tura hriattir an ni a. Zirna in hrang hrangah pawh he hun hi urhsun taka hmang ve tura beisei an ni tih sorkar chuan a sawi a ni.

VC awm thei tur zat a bithliah fel

2012-01-27T21:05:00.001+05:30

State Election Commission-in Village Council inthlan tura VC seat zat a bithliah dan chuan In 200 ah seat – 3 a awm ang a, In 201 atanga 500-ah – seat 5, In 501 atanga 1000–ah seat 7 leh In 1000 aia tamah – seat 9 a awm dawn a, hetianga seat awm tur zat bithliah hnuah hian Dist 6-a VC 510-a seat awm zat chu a vaiin 2118 a ni a, khaw hrang hrang than dan a zirin VC hlui-a seat zawm zat leh tun tum inthlana seat awm zat tur hi a danglam zeuh zeuh dawn a ni.
Hetihlai hian, Village Council inthlanna thlaleh ni 23-a nei turin ruahmanna kalchhoh pui mek a ni a, tunah hian chuh tum te tan hun hawn mek niin, thla thar ni 1 ah khar a ni anga, a tuk ni 2-ah thil tul zawng zawng endik a ni anga, ni 3 thleng in hnukdawk duh te tan hun hawn a ni ang a, hemi rual hian Aizawl Municipal Council huamchhunga Local Council 82-ah ah inthlanna neih nghal a ni dawn bawk a ni.

Governor-in Zoram mipuite a chah

2012-01-26T21:10:00.000+05:30

    Governor Vakkom Purushothaman-an hmasawnna nei turin State chhunga remna leh muanna vawng nung reng turin mipui a chah.
    Vawiina Republic Day vawi 63-na lawmna Aizawl Ramhlun Sports Complex-a neihah he thu hi sawiin Governor chuan ram hmasawnna atan muanna boruak a awm a ngai a, Mizoram chuan hneh taka dan leh thupek kengkawhtute a neih bakah NGO te, kohhran leh an hnuaia pawl hrang hrang te, thuthar thehdarh tute leh mipui ten state ralmuang ber a nih zel theihna turin hma an la reng a ni a ti.
    Ei leh bara state chhung dinhmun siam thatna tur leh mirethei te chawikanna tura duan, NLUP rah hmuh theihin a awm chho mek tih sawiin Governor chuan he ruahmanna tha tak leh a thil tum ti hlawhtling tur hian NLUP dawngtu zawng zawngte chu anmahni eizawnna thlan theuhvah rinawmna leh tumruhna nen, taima taka hna an thawh a ngai a ti a, ei leh bara hmasawnna hnukpui chu lo neih leh a zawmpui hna peng hrang hrang hmasawnna nen a in thlun zawm tlat tih sawiin, Loneitute leh hnathawktu te hmasawnna tel lovin Mizoram chu ram nuamsa a ni tak tak thei ngai dawn lo a ni a ti a, hei vang hian Mizoram sorkar chuan kawng hrang hrangin loneitute hamthatna a ngaihtuah sak a ni a ti a ni.
    Intodelh turin thil siam chhuahna, Industries lamah hma lak a tul thu sawiin, Mizoram chu India ram mau zawng zawng semruala zaa 14 zet thawhtu anih avangin, industry a hma lakna tur pawimawh tak pakhat chu mau sawngbawlna lam a ni tih a sawi a ni.
    Governor chuan Autonomous District Council 3 te pawhin nasa takin hma an sawn thu sawiin Mizoram sorkarin District Council te mamawh leh a bika an harsatna te a hria a, a ngaihven tih a sawi bawk.
    Republic Day lawmna hi vawiin zing dar 9 khan Ramhlun Sports Complex ah neih a ni a, Governor chuan hnam puanzar pawt pharhin Parade Contigent 24 te chibai a chhanglet a, he inkhawmah hi Chief Minister Lalthanhawla; Speaker Pu R.Romawia; Council of Ministers; Parliamentary Secretary te leh MLA engemawzat an tel a ni.

Sai sualin a nawr hlum

2012-01-26T21:00:00.000+05:30

    Mamit Dist Zawlnuam bulah sai sual 1- in a pu Suleiman Uddin kum 45, Assam-a Nagra khua chu a nawr hlum.
   He thil thlenna hmun hi Kanhmun atanga km 10 a hla Zawlpui hmunah a ni a, chawhnu dar 2 leh dar 3 inkar vel khan teak thing an hnuh naah sai hian a pu chu teak thing-ah nawr betin a hmunah ka pawh chhawn lovin a thi a ni.
   He Sai hi helai hmuna sai chhawr zinga a lian ber ni a sawi a ni a, he sai laka mipui an him theih nan mipui te chu inralring tura aurinna a hrittir an ni a, amaherawhchu tun dinhmunah a hlauhawm lutuk lo ni a hriat a nih thu OC chuan a sawi.

Thihchilha car bomb puakah mi 17 an thi

2012-01-26T20:59:00.000+05:30

Afghanistan Helmand province khawpui, Lashkar Gah-a vawiina thih chilha car bomb tihpuahah mi 17 an thi a, midang thahnem tak an hliam bawk.

Provice Dy Police chief, Kamaludin Shirzai-a’n a sawi danin, bomb hi education dept building bula tihpuah a ni a, thite pawh civil mi deuh vek an ni. Thi leh hliam zat chiah hi hriat theih a la nilova, thi zingah hian ramdang sipai-te pawh an tel thei niin Shirzai-a chuan a sawi a, bomb puak hian lirthei 6 a nghawr chhe vek tih a sawi bawk.

S. Dinga`n a bial thenkhat a tlawh

2012-01-26T20:57:00.001+05:30

     Chhim lama cham mek Parliamentary Secretary S.Laldingliana chuan vawiin ni 26.1.2012 zing khan Lunglei Sethlun a tlawh a, hemi hnu hian Lunglawn Field-a Republic Day hmanna a chhim leh.
     Hemi hnu hian S.Dinga hian Theiriat tlawhin Party hruaitute leh khawtlang hruaitute a kawm a, khawtlang mamawh hrang hrang a hnena an lo thlente a thlirpui bawk. S.Dinga hi Lunglei District Congress Committee President Thanatlinga'n a tawiawm a ni.
     Tum lawk dan chuan S. Dinga hian naktuk (Dt 27.1.2012) ah Ṭhaizawl leh Bualte a pan ang a, Party hruaitute a kawm ang.

Lungleiah Republic Day ropui taka lawm a ni

2012-01-26T14:34:00.000+05:30

Lunglei 26th January, 2012 : Vawiin chawhma dar 10:00 khan India ram hmun dang ang bawkin Lunglawn mual, Lungleiah Republic Day vawi 63 na urhsun taka hman a ni. Lunglei Dist. Bawrhsap V.Sapchhunga, IAS, chu khuallian niin India hnam puanzar a pawtparh a, parade contingent 15 te zahna chibai buk a lo chhanglet.
    Lunglei bawrhsap chuan India ram ropui mahni ro a inrel hran na in kum 63 hmel a lo hmu ta chu a lawmawmin zalenna sualtute inpekna avanga lo awm a nih thu a sawi a, zalenna avangin Mizoram pawh nasa takin hma a lo sawn phah ve ani ati. Lunglei Dist. a hmasawn na hrang hrang tarlang in sawrkar hma lakna hi sawrkar hnathawk te ringawt tan chuan tihhlawhtlin a harsat thu leh mipui vantlang kohhran leh tlawmngai pawlte phung bawmna a pawi mawh thu a sawi. Bawrhsap chuan ram leh hnam a min siamtu Pathian ring chungin thawhho na tha neihpui zel turin Lunglei Dist. mipui te a sawm nghal bawk ani.
    Vawiin Republic Day parade ah Sacred Hearth School contingent chu School uniform ha zingah lamthiam ber niin, Armed contingent ah 57th Bn. BSF pakhat na an ni a, Unarmed ah Gov’t High School NCC te chu pakhatna an ni bawk.
    Kumin Republic Day pual hian Hockey leh Table Tennis-ah te inelna siam a ni a, Lunglei Zotlang GSA chuan TT ah Gold medal la tam berin pakhatna an ni a, Hauruang leh Lunglawn ten Hockey-ah Final an khel bawk a ni.

VC leh MLA inthlana vote hralh ching an awm thin hi a pawi - DC

2012-01-25T23:38:00.001+05:30

    Vawiin khan Saikuti Hall ah National Voters’ Day hman a ni. V Sapchhunga, IAS Lunglei DC leh District Election Officer, Lunglei ni bawk chu khuallian a ni.
    He hunah hian Govt. Venglai High School naupang pahnihin Chief Elction Commissioner atanga thuchah an dawn chu an chhiarchhuak a, dik taka vote thlak tur leh vote nei te’n an chanvo hriaa dik taka hmang thiam tura fuihna thu a ni.
    Khuallian, V Sapchhunga, Lunglei DC chuan VC leh MLA inthlanah te vote hralh ching an awm thin chu pawi a tih thu a sawi a, ngaihtuahna fim tak neia vote thlak theuh tura mipuite a duh thu tarlangin, a bik takin vote nei tharte chuan fimkhur a tul zia hriaa ngunthluk taka inngaih-tuah hmasa turin a duh tih a sawi.
    DC chuan India danpuiin dikna leh chanvo khua leh tuite a pek hi democracy hlawhtlinna pawimawh tak a ni, a ti a, State Election Commission in BLO a ruatte chu induhsakna awm miah lo va hna thawk turin a duh a, vote nei thei tawh phawt chu vote thlak thei ngei tura inpuahchah a pawimawh thu a tarlang.
    DC chuan inthlan lo awm mai turah pawh rilru fim tak hmanga mipuite’n an duh zawng vote theuh turin duhsakna a hlan nghal.
    National Voters’ Day lawmna inkhawm hi Zathangliana, SDC & AERO chuan a kaihruai a,Voters thar te EPIC card chu khuallian hian a sem bawk.
    BLO hnathawk tha zualte hnenah lawmman hetiang hian pek a ni : Pakhatna-F Ngaihkhuma, Gov’t Primary School, Rahsiveng, Lunglei; Pahnihna-K Lalrinchhunga, Teacher, Gov’t Primary School, Tawipui North; Pathumnaah hian mi pathum an awm a,chungte chu Rohmingthanga Ral-te, Teacher, Gov’t Bethlehem Middle School, Electric veng; Biakthan-zuala Chhangte, Teacher, Practicing Middle School (DIET), Venglai leh K Rinkima, Teacher, Primary School, Ramthar te an ni.

S. Dinga`n a bial a tlawh

2012-01-24T19:22:00.001+05:30

Vawiin Jan. ni 24, 2011 (Thawhlehni) hian S.Laldingliana Parliamentary Secretary chuan a bialfan programme kal lai angin Sairep leh Hrangchalkawn khuate a tlawh.

Dinga hian Sairep leh Hrangchalkawnah hian Party leh khawtlang hruaitute kawmin hun tha tak hman ho a ni a. Khawtlang mamawh hrang hrangte sawi ho a nih bakah Party hruaitute kawmin Dinga hian Village Council inthlan lo awm tura tan lak dan tur leh thawhho dan tur a sawipui a ni. Dinga chuan Party hruaitute a kawmnaah "Kan hma lawkah hian VC inthlan lo awm turah hian kan ngaihtuahna thiam taka kan hman a pawimawh a, sawrkar dinglai thlawpa thawhpui thiam tur mi, mi dik leh rintlak, khawtlang hmangaihtu kan thlang chhuak thiam tur a ni" a ti.

S.Laldingliana hi Zodinga Block-I President leh LDCC organiser Lalthakima bakah Party hruaitu mi engemawzat in an tawiawm a ni.

Serena Williams a tla

2012-01-24T16:32:00.002+05:30

Australian Open hmeichhe lama roreltu lo ni tawh thin Serena Williams chu rin loh takin Russian Ekaterina Makarova chuan fourth round atangin 6-2, 6-3 in a vawthla.

Tournament tan hmaa a kheimit hliam Williams hi he match-ah pawh hian rei lote enkawl a ni a, mahse world number 56 laka a tlawm chhuanlamah a hmang duh chuang lo. Williams hi Australian Open-ah na na na chuan player tha ber tih loh rual a ni lo, a chak lohna hnuhnung ber pawh 2008-a quarterfinal-a Jelena Jankovic laka a tlawm kha a ni.

Makarova hi last 16 kai zingah chuan ranking-a hniam ber a ni a, Grand Slam quarterfinal a luh vawikhatna a ni. Makarova hian a hnampui Maria Sharapova leh German Sabine Lisicki te inkhela a chak zawk nen an intum ang. Inkhel dangah world number two Petra Kvitova chuan world number one pawh lo ni tawh Ana Ivanovic chu 6-2, 7-6 a hnehin quarterfinal a lut bawk.

Mipa lamah British number one Andy Murray chuan a zawna kum 3-na atan quarterfinal a inhlangkai ve bawk a, a tumpui Mikhail Kukushkin lakah 6-1, 6-1, 1-0 a hma a hruai laiin Kazakh tlangval hi inhliam vangin a chawl a ni. Fourth seed Murray hian quarterfinal-ah Jo-Wilfried Tsonga hnehtu Japanese Kei Nishikori a hmachhawn leh ang.

Arsenal boss Wenger a insawifiah

2012-01-24T16:31:00.000+05:30

Arsene Wenger chuan defence lama an buai deuh chungin transfer market-ah hmanhmawh taka zuanluh a tum chuang lo. Nizanhmasaa 2-1 a Manchester United laka an tlawm tum khan Thomas Vermaelen leh Johan Djourou te kha an indaih lovin an position lo pawh an ven reng a ngai a, United goal hnihte kha wide position atanga lut ve ve an ni.

Wenger hian Christmas hma atang tawh khan full-backs fit tha pangngai a nei lo a, mithar lei ai chuan Bacary Sagna, Keiran Gibbs leh Andre Santos te fit thuai tura hmalak a thlang zawk. An nawr luih luih lai pawha sum hmang hnem ve ngai lo Wenger hi sum hman an mamawh niin a hria em tia an zawhna chu, "Ka ti ngai lo. Sum hman hi ka thil tum a ni ngai lo. Engtiklai mahin ka tum a ni ngai lo. Kan players-te hi lokir se kan ti a ni mai. Players 10 lai hman theih loh kan nei. Second half kha in en chuan kan players hliamte kan mamawhzia in hre mai ang," a ti.

Kha match-a 2nd half-a Alex Oxlade-Chamberlain a thlak avanga fans hovin an ‘boo’ chiam avang khan fans ho a chhang let. Chamberlain a vawikhatna atana Gunners first team-a a telna a ni a, first half-ah khan a khel tha ber pawl a ni. Minute 74-naah Wenger-a’n lachhuakin Andrey Arshavin a luh tir a, fans mai bakah striker Robin van Persie pawhin ‘no’ tiin a lungawi loh hmel hle a ni. Wenger chuan, "Substitution chungchanga fans ho lungawi lohna kha ka hrethiam a, thil tha tak a nih loh phei chuan, mahse Chamberlain kha a chau tawngkhawng tawh a ni. Kar tluan khan a dam lo a. Arsshavin hi Russia national team captain a ni..... Kum 30 lai manager ka lo ni tawh a, subs pawh vawi 50000 ka siam tawh. Ka thutlukna siam zawng zawng hi ka sawifiah kher a ngai lo. Ka tang tlat ang," a ti.

HPC Cup Football Champion lawmman Rs.1,00,000

2012-01-21T00:07:00.002+05:30

Nimin khan DC Office Chamber-ah HPC Cup Organising Committee member te an meeting a,kan hma lawka HPC Cup Football Tournament lo awm tur chungchang an rel.

Meeting hi Addl.DC T.Lalduhawma`n a kaihruai a, Secretary R.Buanthanga`n Sub.Committee peng hrang hrangten Budget an siamte a pharh a, sawiho a ni a, hetiang hian pass a ni. Decoration Rs.23,000, Technical Committee Rs.3,55,660, Catering/Refreshment Rs.9,01,400, Power & Water Supply Rs.3660, Information Rs.15,000, Entertainment Rs.50,800

Tichuan a vaia sum mamawh pass zat chu Rs.5,41,520 a ni a, Budget hi Rs.6,00,000 a ni.

Meeting chuan February ni 29 thleng Mimi Hardware Bazarveng leh DSYO Office-ah te tel tumten Entry fee pek nise, an ti a, Team khat tan Entry fee Rs.200 nise an tia, Tournament khel tan hun atan March thla leh April thla vel ruahman chhin a ni.

Inkhel dan tur ruahmanah chuan Knockout-a khel nghal nise, Quarter Finals atangin zan lamah pawh a \ul chuan khel nise an ti a, lawmman hetiang hi nise an ti. 1st.Rs.100000 (Trophy, Medal, Certificate), 2nd.Rs.50,000 (Trophy, Medal, Certificate), 3rd. Rs.25,000, 4th.Rs.12,500, Quarter Finalist Rs.6,000, Pre Quarter Finalist Rs.2500, Fair Play Rs.10000 (Citation), Top Scorer Rs.3000 (Citation), Best Player Rs.3000 (Citation) Opening-ah CM beisei nise, Closing-ah Sports Minister beisei nise an ti bawk.

MJA Lungleiin HPC Vice Chairman an pe

2012-01-21T00:06:00.000+05:30

Nimin chawhnu Dar 2:00 khan HPC Vice Chairman Joseph Lalhimpuia Office-ah Lunglei MJA te leh HPC Vice Chairman ten Programme an hmang a, HPC Vice Chairman in Press Tour a buatsaihsak avanga lawmthu sawi paha Tour atanga an thil hawnsak HPC Vice Chairman hnenah hian an hlan. Inkhawm hi President-in a kaihruai a, Tour reports- Malsawmsanga PRO leh F.Lalngaihzuala Secretary ten an pe. Lalrintluanga Khiangte Vice President-in an thil hawnsak a hlan a, Pc.Lalduhthlanga Treasurer in Official in chibai a buk.

HPC Vice Chairman Joseph Lalhimpuia chuan thusawiin, ‘MJA ten Tour hlawhtling tak in nei thei hi lawmawm ka ti a, in hlawkpui ngei ka beisei a, ram leh hnam tana thawk tur hian nangni aia pawimawh in awm lo, mipui leh keini hian ram siam hna i thawk ang u,’ a ti

LUNGLEI PLAYER 6 INDIA HUAPAH

2012-01-19T23:17:00.002+05:30

6th.Shitoryu Karate National Championship chu Aizawl Luangmual Indoor Stadium-ah niminpiah khan Chief Secretary-in a hawng a, State hrang hrang leh Force lam atangin Players thahnem tak an fuankhawm.
Mizoram atangin Players 33 in an khel dawn.
Lunglei Dist. atangin Mizoram tana khel tur Players 6 an phei ve a, chungte chu Subash Kanti (Tlabung)-Open Dojo, Jorina leh Baskoloki (SSA)- KGVB Residential Girls Hostel Tlabung ve ve. AMKA Lunglei Dist.Gen.Secy. chu Referee leh Judge in a kal.

ZNP-AH MITHAR LAWMLUT

2012-01-19T23:16:00.002+05:30

Vawiin khan Saikuti Hall-ah ZNP in mithar lawmluh Programme an hmang. Inkhawm hi ZNP Sub.Hqrs.President R. Zanghina`n a kaihruai a, Upa H.Dengthanga`n hunserh a hmang.
F.Malsawma Ex.Mi-nister leh R.Lalawia Ex. Speaker ten thu an sawi a, F.Malsawma chuan zuang lawr an tih \hin chu zuanglawr lo thei lo va a awmna Party ten an siam avanga tun dinhmun thleng a nih thu leh zuang lawr ngam a nihna chu huaisenthlak a tih thu a sawi a, R.Lalawia chuan MNF chu Party chhia a nih loh thu sawiin a khuahna (Party hruaitute) an chhe em a ni a ti a, ZNP in lalna an chan chuan kuthnathawktute tana hnathawh an tum thu a sawi. An lawmluh zingah hian MNF Sub.Hqrs. President lo ni tawh F. Lalthankaia pawh a tel niin thudawnna chuan a sawi.

Dr. RL Hnuni Ordain remti ta

2012-01-18T18:26:00.000+05:30

Vawiin atanga tan, BCM Assembly Executive Committee Meeting chuan an thu ngaihtuah langsar zinga pakhat – Hmeichhe Theologian, Dr. RL Hnuni, Principal, AICS ordain chungchang chu ngaihtuah lehin kumin Assembly-a ordain turin a passed ta.

Dr. RL Hnuni ordain chungchang thu hi Pastor Bial, ABC leh Pastoral Committee-ah te ngaih-tuah a lo ni tawh thin a, tun tum hi Exe. Comtt a thlen vawihnihna a ni.

Dr RL Hnuni Thu-thlung Hlui lam thiam bik a ni a; Aizawl Theological College- leh Eastern Theological College -ah te lecturer hna a lo thawk tawh a ni. Rev. Dr.K Thanzauva nen 1980-ah an innei a ni, Fapa pahnih leh fanu 2 an nei. BCM-in AICS a din tirh, kum 2001-ah Principal-ah dah a ni a, vawiin thlengin he hna hi a la chhunzawm.

BCM Assembly 2012 hi March 7 - 11 ah Mizoram Baptist Kohhran, Electric veng, Lungleiah neih a ni dawn a, March ni 11, Pathianni In-khawmah Ordination hi neih a ni ang.

Source - mizobaptist.org

”Corruption a zung nen kan phawi mek” - CM

2012-01-16T21:06:00.002+05:30

Chief Minister Lalthanhawla’n, hlemhletna, Corruption chu a zung nen an phawi mek tih sawiin, phoro an la hmabak niin a sawi.

Vawiina Mamit East Block Congress Conference, Political Traning ni bawk, Lengpui Community hall-a neih a hmanpuinaah he thu hi sawiin Chief Minister chuan, Mizoram natna vei hlauhawm ber chu 'corruption' a ni a, mipuite a chiah hneh hle tawh a ni a ti a, mipui khalh ngil turin Fel lo, dik lo leh tha lo te haichhuah mek a ni a bawk.

Tun sawrkara hruaitute chu eirukna lakah an la fihlim hle ni a sawiin, eptu lam pawhin eiruk thu-ah sawrkar dinglai beihna tur zawng reng mahse beihna an la hmu lo a ni a ti a, Politics-ah chuan hruaitu ni tur chuan chhiahhlawh nih a ngai a, Mizo kalphungah phei chuan hei hi pawm ngam a ngai, VC leh MLA te chu mipui chhiahhlawh an nih angin, lal anga len a thiang lo, a ti a ni.

Chief Minister chuan Politics chu sum siamna emaw sumdawnna emaw a ni lo a, mipui rawngbawlna atana hniam thei ang bera inpekna a ni a ti bawk.

Robbie Keane-a`n Aston Villa a zawm

2012-01-14T22:46:00.000+05:30

Robbie Keane chuan Los Angeles Galaxy atangin loan-in Aston Villa a zawm fel ta a, kum 13 zet he midlands club player ni tura a nghah hnuah a hlawhtling ve ta a ni.

Republic of Ireland international hi 1999 khan Wolves atangin Villa hi a zawm hman teuh hle a, mahse a insawn dawnah inbiakna a sukuk avangin Coventry a zawm leh ta zawk a ni. A duhthusam ang ngeiin Villa player chu a ni ve ta a, mahse hei hian a daih rei dawn lo hle a, March thlaa Major League Soccer an tan leh hma chauh a daih dawn a ni. Villa hian Galaxy hnen atangin Ningani zan khan phalna an hmu ve chiah a ni.

Villa boss Alex McLeish chuan Keane hi Birmingham a enkawl laiin lakluh a lo tum tawh a, mahse US a pan hma hian nikum khan loan-in West Ham a zawm leh ta zawk a ni. Vawi 2 lakluh a tumnaah a hlawhtling ve ta a ni.

Pacquiao & Mayweather Jr. an inbei dâwn ta

2012-01-14T22:43:00.000+05:30

Philippine superstar Manny Pacquiao chuan Floyd Mayweather Jr-a’n May thlaa inhnek tura a chona chu a pawm nghal.

Nilaini khan Mayweather hian Pacquiao hi ‘khawvel mipuiten an hmuh chak em em tihlawhtling turin’ a ko chhuak a, a ni atan pawh May ni 5 a ruat nghal a ni.

He super-fight nghahhlelhawm tak tihlawhtling tur hian harsatna tlem a la awm dawn niin a lang a, Pacquiao hian he fight hi tihhlawhtlin ngei duh mahse a ni atan chuan May thla chawhnu lam a duh zawk a, Mayweather hian a sum chan tur a tifel thei lo niin a sawi bawk.

Pacman chuan, “He fight hi khawvel hmuh chak ber chu a ni. Mahse Mayweather hian a sum hmuh tur a tihchian a ngai a, a tih tur chu guarantee pe thei promoter a hmuh a ngai a ni mai. Guarantee a hmu a nih chuan revenue chu 50-50 in kan insem mai ang,” a ti. Pacquiao promoter Bob Arum pawhin, “Kan lamah chuan harsatna a awm lo a, harsatna awm thei chu Mayweather te lamah a ni. Mayweather hian a sum hmuh tur tichiang thei tur midang a mamawh a ni. Maywather hian tumah a nei lo a, GBP (Oscar de la Hoya's Golden Boy Promotions) chuan an tihsak dawn lo reng reng,” a ti bawk.

Arum leh Pacquiao te financial advisor Michael Koncz chuan he bout hi Las Vegas-a mi 45,000 len theihna arena peihfel a nih hun, May thla tawp lamah an duh a ni. Mayweather-a’n a fight neih leh hun tur May ni 5-a a hauh lawk MGM Grand hi mi 17,000 chauh len theihna a ni a, Koncz chuan he arena thara an inhnek thei a nih chuan hlawkna Dollar maktaduai 30 lai an hmuh belh phah thei dawn a ni tih a sawi. Kum 33-a upa Pacquiao hian a vawi 3-na atan November khan Mexico's Juan Manuel Marquez hnehin WBO title a humhim a, thla thara kum 35 tling mai tur Mayweather hian September thla khan Victor Ortiz hnehin WBC title a la bawk a ni.

Assam Rifle leh Para Military Force diltute hriat tur

2012-01-11T20:55:00.000+05:30

MZP kal tlanga Assam Rifle leh Para Military Force dang diltute Ni 12-14 January, 2012 (10 am- 1.30 pm) chhung hian AR Ground Aizawl ah Medical Test nei turin document kimchang nen kim vek tur a ni. Medical Test a tlingte ni 16 January (monday) atangin Pre-Training neih tur a ni.

Political party office an hawng tan leh ta

2012-01-09T20:17:00.002+05:30

    Political party office te vawiin atang khan hawn tan a ni leh ta a, hemi rual hian thlaleha Village Council leh Local Council inthlanna neih tur atana inbuatsaihna ngawrh lehzuala kalpui nghal a ni.
    Vawiina MPCC Office Congress Bhavan hawnnaah MPCC President, Chief Minister Lalthanhawla’n a kaihhruai sorkar chu kum dang aia tluang leh chak zawka kal turin an in beisei tih a sawi.
    Kum liamtaah sorkar chuan buaina leh harsatna leh mualphona a tawk lo chu lawmawm a tih thu sawiin, ei leh bar leh mihring nitin mamawh lamah te pawh Christmas leh kumthar chhungin harsatna a awm lo a ti a, police te leh tlawmngai pawlte thawh hona avanga hunpui muanawm tak hman a ni tih sawiin, lawmthu a hrilh a ni.
    Hun thara lut mek te chu kum bul atanga Pathian kuta inkawl tira, aduh zawng ti tura chahin, Pathian malsawmna dawng thei tura kum thar bul tan turin Zoram mipuite a ngen bawk.
    MNF Party office Hnam Run hawnaah, party President Zoramthanga’n, kum tharah hian Sorkar thil tih dik loh an hriat chu an nawr na hle dawn tih a sawi a, thlaleh lawka VC leh Local Council inthlanna neih turah hnehna chang turin thawh tan a ni ang tih a sawi a, candidate siam chungchangah a phur phur dah ngawt lo vin, a tling thei tur zawn a ngai a ti.
    An party chuan Sawrkar hnathawkte harsatna chik zawka an bihpui tur thu te, mipui harsatna vil tur thu te leh chhiah sang lutuk chu mipui hmangaihna avangin an do dawn tih a sawi a, Mizo Nationalism chu nasa leh zuala tlangaupui an tum thu a sawi bawk a ni.
    Hetihlai hian, Lungleiah pawh vawiin khan Pol. Party hrang hrang ten kumin atan an Party Office hawnna neiin Pathian hnenah inhlanna vawiin khan an nei a, Rorel lai Congress Party chuan VC inthlan lo awm turah chak ngei tur a infuihna hun hmangin Party tan a thatna anih dawn chuan tuna VC dinglai te pawh Inthlan lo awm leh turah VC chuh tawh lo ngam turin an inhrilh niin kan corr chuan a sawi a, MNF party pawhin VC inthlan lo awm leh turin an inbuatsaih nghal a ni.

Mizoral Oil Palm tharchhuah

2012-01-09T20:16:00.001+05:30

    Mizoramah kum kalta chhung khan Oil Palm metric ton 132 chuang hret tharchhuah a ni.
    Agriculture Dept hotute sawi danin sumdawnna atana hman tlaka chhuah turin Oil Palm chin uar leh zual a ni a, kumin chhung hian ram hectare 5350 a zauah chin pun leh tum a ni a, tun dinhmunah Mizoram pumah Oil palm hi ram hactre 9717 a zauah phun niin, a kung nuai 14 vel a awm tawh a ni.
    Oil Palm chin kawngah hian Mizoram chuan a tihthat avang leh sorkar laipuiin ching tura a tih zat aia tam an chin avangin, tanpuina sum cheng nuai 826 sum a pek belh dawn tih Agriculture dept hotute chuan an sawi.
    Kum 2007 atanga chin tan a nih hnuah, Oil Palm atan hian sorkar chuan cheng nuai 3132 a seng ral tawh a, a rah herna hmun Bukvannei ah bun fel tawhin, Mat lui kamah leh Rotlang ah bun turin hma lak mek a ni bawk a, a herna khawl bun nan hian cheng nuai 600 zel ruahman niin heta tanga cheng nuai 250 chu sawrkar laipui tum tur a ni.
    Mizorama Oil Palm thar te hi Company pathum- Godrej Oil Palm ltd, Ruchi Soya India ltd leh Food , fats and fertiliser ltd ten an lei thin a, heng company 3 leh Oil Palm chingtute inremna siam tawh angin, a chingtu chhungkhaw 2951 hnenah Oil palm tiak nuai 2, sing 9 & 2677 sem chhuah a ni tawh a ni.

Israel-in ram venhimna`n sum a ruahman belh

2012-01-09T20:14:00.001+05:30

    Middle East leh West Asia-a boruak chhe chho zel thlirin Israel chuan ram venhimna tur, defence budget atan dollar maktaduai 700 chuang ruahman belh a tum. Prime Minister, Benjamin Netanyahu-a chuan Middle East leh Egypt rama sorkar inthlak danglam te, Iran nuclear prog avang-te in tun dinhmuna defence budget lo tih hniam chu thil pawi tak a tling thei dawn niin a sawi a ni.
    Hetih lai hian khawvel pum huapa mihring dikna chanvo humhalhtu pawl, Amnesty International chuan Middle East leh North Africa ram hruaituten an rama democracy rorelna an tundin lohva an ram mipuite dikna chanvo an humhalh loh chuan kuminah pawh nawrhna leh buaina an hmachhawn leh a ngai dawn niin a sawi.
    London-a report an tihchhuahah Amnesty International chuan kum kalta 2011-ah khan Middle East leh North Africa ram sorkarte hian sorkar kalphung tidanglam tura mipuite nawrhna hmet mit turin tharum thawh an pawiti lo tih a lang chiang hle tih a sawi a, buaina tireh tur hian African Union, Arab League leh EU-te pawhin theihtawp chhuah mahse buaina ril zia hi an la hrethiam tak tak lo niin a sawi bawk.

Mizorama vote nei thei zat an tarchhuak ta

2012-01-05T20:11:00.000+05:30

Mizorama vote neite hming leh thlalak chuanna Photo Electoral Roll, 2012 ennawn hna zawhfel a ni a, vawiin khan tar district Bawrhsap office zawng zawngah tarchhuah a ni ta a, vote nei thei hi state pumah nuai 6, sing 5 sang thum leh 208 an awm a ni.

Directorate of Election-in thuchhuah a siam danin vote nei thei hi mipa aiin hmeichhia an tam zawk a, hmeichhe vote nei mi nuai 3, sing 3 sang 1 leh 664 an awm laiin mipa vote nei chu nuai 3, sing 2 sang 1 leh 544 an awm thung a, service voter 3,418 an awm bawk.

Hming thun belh zat hi sing 2, sang 1 leh 187 a ni a, hming paih zat chu 9,422 a ni thung a. Nikum electoral roll aia vote nei thei punna chu sing 1, sang 2 leh 545 a ni a, chu chu za zela pakhat point pakua pali pung ang a ni.

Assembly biala vote tamna ber chu Lawngtlai district-a Tuichawng bial a ni a, vote nei sing 2, sang 5 leh 198 an awma, vote nei tlemna ber Lunglei district-a Thorang bialah chuan vote nei sing 1, sang 2 leh 39 a awm thung a ni.

Kum 2011 chhiarpuiah khan mipa 1,000 zela hmeichhia 975 a awm laiin kum 2012 electoral roll-ah chuan mipa 1,000 zelah hmeichhia 1031 an lo awm ta a. Chhiarpui-a mihring awm zata chhutin vote nei thei hi za zela 58 point pakua paruk an ni.

Mizoram pumah polling station 1,031 a awm a, polling station zingah hian Palak Assembly bial chhungami Lope Polling station-ah vote nei an tlem ber a, vote 29 chauh a awm a, chutih laiin Aizawl North Three bial chhunga Edenthar Polling Station-ah chuan vote nei thei 1,444 awmin vote awm tamna ber polling station a ni. Assembly bial zinga Polling station ngah ber chu polling station 65 awmna Lawngtlai West bial a ni a, polling station 15 chauh awmna Aizawl North Three chu polling station nei tlem ber bial a ni thung.

Vote nei zinga kum 18 leh 19 a upa hi sing 7, sang 1 leh 439 an ni avote nei thei zawng zawng atanga chhutin za zela 10 point pakua pali an ni a, kum 18 leh 19 vote nei thar punna hi za zela 25 point paruk pahnih a ni thung a ni.

Mizorama electoral roll-a hming chuang zawng zawngin Electoral Photo Identity Card (EPIC) an nei kim vek tawh a, Mizoram chu ram chhunga zaa za EPIC pe chhuak thei state pasarihna a ni. (AIR)

Mizoramah boruak bawlhhlawh a tlem

2012-01-05T20:07:00.002+05:30

Kum hlui thlah zan leh Kum thar ni khan Mizoram hmun hrang hrangah boruak bawlhhlawh a tlem hle a, hriselna atana thalo khawpa boruak bawlhhlawh leh bengchheng a awm lo a ni.

Mizoram State Pollution Control Board (MSPCB) thuchhuahin a tarlan danin Aizawl, Lengpui, Lunglei leh Champhai-ah te boruak bawlhhlawh dan hi nikum December ni 31 leh kumin January ni 1 khan teh a ni. Boruaka bawlhhlawh leng vel chu ram pum huap (national standard)

aia hniam vek a ni a, boruak tibawlhhlawha mihring hriselna tichhe thei Sulphur Dioxide leh nitrogen dioxide phei chu a awm zat hriat theih loh khawpin a tlem a ni.

Bengchheng tehnaah pawh chhunlaia sorkar phal chin bengchheng tehna decibel 55 a nih laiin Aizawlah chuan decibel 46 chuang hret a ni a, zanah pawh sorkar phal chin decibel 45 a nih laiin Aizawlah chuan decibel 36 chuang hret a ni.

Pollution Control Board chuan hetianga tunhmaa boruak thianghlim loh lai ni \hin kumhlui thlah zan vela hetiang taka boruak a lo thianghlim ta hi lawmawm an tih thu an sawi a, Mizo mipuite pawh an hrisel phah sawt dawn nia sawiin sorkar, police leh dan kengkawhtu dangte bakah mipui zirtirtu YMA leh thuthar thehdarhtute hnathawh rah a ni, an ti bawk a ni. (AIR)

Mindanao thliarkara leiminah mi 25 an th

2012-01-05T20:03:00.001+05:30

Philipines ram Mindanao thliarkara vawiina leiminah mi 25 an thi a, mi 100 chuang chin hriat loin an la bo.

Sawrkar lam atanga thudawn danin, he leimin hi ni engemawzat ruah a sur vang niin an sawi a, thi te hi he thliarkar a lunghlu lai chhuak tute vek an ni a, chhan chhuah hna hi ngawrh taka beih mek a ni.

Chapchar Kût lawm turin sorkar a inbuatsaih mek

2012-01-04T21:27:00.002+05:30

Mizo hnam kut lian ber Chapchar Kût lawm turin sorkar a inbuatsaih mek a, vawiina Chapchar Kût Programme Committee an Chairman, Art & Culture dept Director Ngurbiaka hovaa officea thukhawm chuan Chapchar Kût neih dan tur an duang chhin a, a hun leh a rei zawng tur erawh an la siamfel thei rih lo.

Committee hian State Level Chapchar Kut Committee a thlen turin, Chapchar Kut 2012 programme a telh tur chi hrang hrang an pho chhuak a. Chung zingah chuan, Mizo Hnam Lam leh Zai chi hrang hrang entir, hranghlui leh thar zaithiamte zai ngaihthlak, Mizo inchei chi hrang hrang entir leh Live Music Band hrang hrangte zai rem turin an rawt a ni.

Hei bakah hian Industries Dept leh a kaihhnawih ten handloom & handicraft pho chhuahna nei se an ti a, Information Dept huaihawtin, Lemziak thiamte kutchhuak leh thlalak hlui leh thar pho chhuahna neih tur a nih bakah, Art & Culture buatsaihin Mizo ladeh hrang hrang, bel vuak, Mizo rimawi hrang hrangte mipui hmuha pholan ni se an ti a Horticulture Dept huaihawtin pangpar entirsiak neih nise an ti bawk.

Kumin hian Chapchar Kut Miss leh Mister thlanna neih an tum bawk a, heta inlan tur hian Aizawl Branch YMA hrang hrang te chu nula leh tlangval 2 theuh thawh chhuak tura hriattir ni se an ti a, a endiktu tur pawh an ruat nghal bawk a ni.

E/Roll kimchang hi naktûkah a en theih dâwn

2012-01-04T21:23:00.002+05:30

Mizorama vote nei thei te hming thlalak chuanna Photo Electoral Roll 2012 ennawn hna zawhfel a ni a, roll kimchang hi naktuk-ah a duh apiang en theih turin dist khawpui tin DC Office ah en theiha tarchhuah a ni ang a; zawhfiah duh nei tan pawh zawhfiah theih a ni.

Aizawlah chuan roll thar hi Aizawl DC office bakah ERO/AERO office te bakah, Booth Level Officer te leh VC/Local Council te hnenah hian a duh apiangte en theih tura sem chhuah a ni anga, sorkar thuchhuah tarlan danin Aizawl district bikah chuan vote nei thar mi 8562 an awm a ni.

Hetihlai hian, Kum tling tawh roll-a la chuang ve hmanlo te tan Booth Level Officer-te hnenah lehkha pawimawh lam a dil thar reng theih a ni a, roll-a hming thun apiang te thla lak sak nghal zel an ni bawk a ni.

Mizoramah electoral roll-a hming chuang zawng zawngin Photo Identity Card an nei kim vek tawh a, Mizoram chu ramchhunga hetianga zaa za EPIC pe chhuak thei state 7-na a ni.

Khawchhe hnuaiah Zoram mipuiin ruai an theh

2012-01-02T21:09:00.002+05:30

    Mizoramah kumthar lawmna ruai khawchhe hnuaiah vawiin khan mipui ten an theh a, tukin atanga ruahsur avanga nasa taka khawvawt-in Mizoram pum a hmet a, hei vang hian vawiina ruaitheh pawh Krismas aiin an tlem zawk ni a thudawn a ni.
     Tukin khan Aizawlah chuan khaw vawh zawng hi celsius degree 14 vel a ni a, chhunah tlema lum chhovin celsius degree 17-ah a chho a, tunlai chho vah a vawh ber tum a ni a, khaw lum zawng hi nasa takin a tlahniam a ni.
    Vawiin nileng khan ni pawh lang lovin, chhum a zing nasa hle a, hetiang bawk hian dist dangah pawh khua a duaiin, ruah a si seng seng vek a, Champhai dist-ah chuan khaw vawh avangin ruaitheh hnu khan pawn chhuak peih pawh an awm mang lo tih kan corr chuan a sawi a, chhum a zin avangin lirthei khalhtu tan fimkhur a ngai zual a ni.
    Tun tuma Mizoram hmun thenkhat tuama ruahsur hi Bay of Bengal atanga cyclone insiam Tamil Nadu leh Andhra tuipui kamte nuaitu siper nia hriat a ni a, hetihlai hian Mizo te sawi danin, tun ang huna ruahsur hi pawl delh ruah a ni a, kumdangah pawh december thla atanga a sur tan tum te pawh a awm a, hetiang huna ruah tla hian nasa takin khua a ti vawt thin a ni.
    Hetihlai hian, khua a thal rei avangin, ruah tla hi loneitu, a bikin nul siam te tan a lawmawm hle a, khua a ro em avanga harsatna tawk te tan Malsawm ruah a ni tih kan corr chuan a sawi a ni.
    Hetihlai hian, ramchhung hmar lam khawvawt chuan ziaawm lam a pan chho mek a, ruah a sur ve hlek bawk a, darkar 24 lo awm turah pawh a sur chhoh rin a ni.
    Agriculture lam mithiam te chuan he ruah hi thlasik thlai tan a thla hle tih an sawi a, Rajasthan erawh a la vawt hle a, Churu ah chuan a vawh lai berin celsius degree 3.4 a ni tih MeT department chuan a sawi a, Kashmir leh a chhehvel pawh a vawt hle tho a, celsius degree minus 17.2 te a la ni chho a ni.(AIR)

India sum hlutna a tlahniam

2012-01-02T21:06:00.001+05:30

    US Dollar laka Indian Rupee hlutna chu tukin khan pawisa 30-a tlakhniam belhin tunah hian US Dollar khat leh India tangka Cheng 53 leh pawisa 40 a intluk tawk mek.
    Hetianga India pawisa hlutna a tlakhniam belhna chhan hi ram dang atanga bungraw chawluttute’n US Dollar kher an phut avang leh ram pawn lama US Dollar dinhmun a \hat vang a ni.
    Nikum 2011 chhunga US Dolalr laka India pawisa hlutna tlakhniamna hi za zela 18.79 a ni. (AIR)

Mizoram hmun tam zawkah ruah a tla hlek

2012-01-02T12:51:00.000+05:30

Aizawl khawpui leh Aizawl chhehvelah chuan tukin dar 5 vel atang khan ruah tlem tein a sur a; hemi hnu rei vak lovah han lehin tlem te tein a tlak zawm leh thin a, hetihlai hian chhum a zing a, zing dar 7 leh a chanve thleng khan ni pawh a lang thei lo a ni. Khua pawh a lum lova, degree celcius 14 vel a ni mek.
Saiha leh Champhai dist-ah pawh khua a duai a, ruah erawh a la sur lova, Kolasib Dist.-a Vairengte leh Kolasib velah pawh tukin dar 5 vel khan ruah a tla hlek a, hemi hnu atang hian tlem tlemin a la tla reng a ni.
Tun tuma Mizoram hmun thenkhat tuama ruahsur hi Bay of bengal atanga cyclone insiam Tamil Nadu leh Andhra tuipui kamte nuaitu siper nia hriat a ni.

Kumthar hmuaka inbuatsaihna a kal mek

2011-12-31T22:00:00.001+05:30

    Kum thar 2012 lo thleng tur hmuak tura inbuatsaihna chuan a vawrtawp a thleng mek a, boruak tibawlhhlawh thei halpuah leh halmawi lam chi hneh taka khap tur leh boruak muanawm tak hnuaia kumhlui thlaha kum thar lawm a nih theihna’n venhimna uluk taka ruahman a ni.
    Zaninah hian kohhran hrang hrangin kumhlui thlahna inkhawm an hmang a, kumin chhunga kohhran member thite pualin hun hman a ni a, zan laiah kumthar lawmna inkhawm hmun tam berah buatsaih a ni bawk ang.
    Zanin, kumhlui thlah zana thalaite puala prog hman tur sorkar chuan duangin, Lungleiah chuan YMA Sub-Hqrs buatsaihin Saikuti Hall-ah hun hman a ni a, Aizawlah chuan hmun 5-ah intihhlimna hmun hi buatsaih a ni ang.
    Saiha khawpuiah chuan Bazar Traffic Point-ah Zaithiam rual te nen he kumhlui thlahna leh kumthar lawmna hi neih a ni ang a, Lawngtlaiah chuan vawiin chawhnu dar 2 leh a chanve atang khan Areopagi-ah zaithiam leh fiamthu thiamte nen hun hman a ni bawk.
    Vawiin khan Aizawl-ah chuan kumthar lawm tura inbuatsaihte him zawk nan, Zodin square leh Chanmari inkar kawngpui dungah vawiin chhun dar 11 leh tlai dar 4 inkar No Vehicle Zone hman leh a ni. (AIR)

Tuitla ruang chhar ta

2011-12-31T21:57:00.002+05:30

Nimin zinglam dar 3 vela Bairabi PWD Tlawng kaia tlahlum Lalrinawma, kum 27 mi ruang chu tukin dar 10 leh minute 40 vel khan mi tlawmngaite’n a tlakna li atangin an la chhuak a, vawiin vek khan Bairabi Chhim Veng-ah vuiliam a ni.
Lalrinawma hian Tlawng lui hi hleuh kai a tum nia hriat a ni a. Helaia mau tawlha pum-a riak hnamdang awmte’n a thawm an hriatin khaw mite an pun a, an zawng ta nia thudawn a ni. (AIR)

Mizo hmeichhe 2 Accident

2011-12-31T21:54:00.001+05:30

Tukin zinglam dar 4 leh dar 5 inkar vel khan Bangalore khawpuiah Mizo hmeichhe pahnih Rebecca leh Jenny tia hriatte chu an chesual a, an pahnihin an hliam a, a upa zawk Rebecca hi a dinhmun a ngaihtuah awm hle nia thudawn a ni.
Rebecca te pahnih hi scooty-a an inphur lai an hnung atangin motor-in a su a an chesual ta a ni. Jenny zawk hi chua a ngaihtuah awm vaklo a, Rebecca hi St John’s Hospital, Koramangala-ah ICU-ah dah mek a ni a; a luruh a khi a, thisen a tling nasa hle niin an sawi. (AIR)

THlipui avangin mi 33 an thi tawh

2011-12-31T21:52:00.002+05:30

    Thane thlipui tleh vanga Tamil Nadu leh Puducherry-a thi zat chu mi 33 an tling tawh a, cyclone hian Tamil Nadu leh Puducherry-te hi nimin zing khan nuaiin chhiatna nasa tak a thlen a, chhiatna thlen nasatna ber Cuddalore dist-ah chuan hriat theih chinah ruang 21 hmuh a ni tawh a ni. Puducherry-ah pawh mi 7 thiin Chennai-ah 1 a thi bawk a, ruahsur nasa kaihhnawihah Villupuram leh Tiruvallur-ah mi 1 ve ve an thi bawk.
    Thlipui hian thingkung za tel chhem phawng-in electric bante pawh a chhe tlu nasa hle a, hei vang hian rel leh lirthei tlan dan, nasa taka a khaihlak phah bakah hmun tam takah eng a awmlo a ni.
    Hetihlai hian chhawmdawl hna, ngawrh taka thawh chhoh zel a ni a, thlipui tleh atang khan Neyveli Thermal Power Station atangin power engzat mah hmuh a ni lova, National Power Grid atanga kawlphetha lakna hrui, Km 9-a sei Ramanathapuram Power Line a chhiat bawk si avangin power lamah harsatna lian tak an tawk a ni.
    Relief camp hrang hrangah mi sing 2 chuang an awm mek thu leh mi nuai 1 sing 1 hnenah eitur pek an nih thu pawh sawiin tuipui kama rap in dinglaite chu thlipui hian a nuai chhe vek a ni , a ti a, chhiatna thlen dan report dawn belh zel anih thu a sawi bawk.
    Tamil Nadu-ah pawh chhanchhuah leh chhawmdawl hna, chhunzan zawma thawh a ni a, chhawmdawl hna thawh nghalna atan state Chief Minister J Jayalalitha-i’n cheng vbch 150 a ruahman a ni. Chennai khawpuia tuipui kama cheng mi sang 2 chuang, hmun him lamah sawn chhuah an ni a, hetih lai hian Cuddalore, Villupuram leh Nagapattinam dist-ah te chuan inkalpawhna kawngte, siam tlang a ni leh tawh a, khawsak phung pawh a pangngai chho leh tan tawh a ni. (AIR)

Chenna In a kangral vek

2011-12-29T22:35:00.000+05:30

    Serchhip Dist-a Bungtlang Venglaiah vawiin zing dar 9 khan chenna in pakhat bungraw engmah chuh hman lovin a kang ral vek.
    He in hi R.Lalthanpuia in, H.Lalrinkima te chhung kaw luah lai a ni a, kangmei chhuah lai hian in luahtute chu hnathawkin an chhuak tawh a, in chhuahsan hnuhnung ber Lalrinfeli chuan thuk atanga meihawl an thur atangin emaw thuk mei atangin emaw a kang tan nia a rin thu a sawi a ni.
    He in hi a dung fit 12 leh a vang feet 22 niin, tun thla ni 18 atanga luah tan chauh a ni a, Gas leh Electric connection pawh an nei lo a ni.
    In kanna hmun hi DC P.Lalchhuanga’n vawiin chawhma khan a tlawh a, tanpuina cheng sing 1 sang 5 pein, in sak nan Bungtlang VC te hnenah IAY atanga cheng sing 4, sang 5 pek a nih tur thu a sawi a, a thawh khatna cheng sing 3 pawh VC te kutah a hlan nghal a ni. (AIR)

Cabinet-in MPSC kuta peklet a remti lo

2011-12-29T22:33:00.002+05:30

    Cabinet in Mizoram sorkar hnuaia Assistant leh a tlukpui te hna lak leh kaisan chungchang MPSC kuta pek let a remti rih lo.
    Chief Minister Lalthanhawla hova vawiina Council of Ministers Meeting chuan he thu hi relin, Assistant leh a tlukpui Grade Pay cheng 4,400/- la chin te hna lak leh kaisan chungchang chu tuna kalpui dan anga la kalpui zel nise an ti a, hei bakah hian Aikal lak tir officer te chungah hremna khauh tak pek ni se an ti bawk a ni.
    Meeting hian Aikal lak chungchanga kum 2009-a cabinet thurel bawhzui dan an thlir a, tha thawkhata an ngaih thu sawiin, aikal lak sorkarin a khap avangin, he khapna bawhchhia te chauh ni lo, aikal lak tir officer te chungah dept disciplinary proceedings kenkawh ni se an ti a ni. Hei bakah hian Officer pension tawh Commission hrang hranga Chairman-a rawih te lawmman chu tuna dan awmsa, ‘The Fixation of honorarium of Retired Officers engaged as Chairman for various Commissions’ hmanga pek chhunzawm ni se an ti a ni.
    Cabinet meeting hi kumin atana meeting neih hnuhnung ber tur a ni a, Aizawl-a Chief Secy Conference room-ah an thukhawm a ni.. (AIR)

National Bravery Award dawng turin Mizo tlangval

2011-12-29T22:32:00.002+05:30

    A thianpa tuia tla a chhanna lama thi, Lalduhawma kum 21, Aizawl Bethlehem Venga cheng chu rampum huap huaisen lawmman National Bravery Award dawng tura thlan a ni.
    He chawimawina dawng tur thlanna hi Indian Council for Child Welfare chuan New Delhi-ah a buatsaih a, nakum Republic Day lawmna New Delhi-a neih turah Prime Minister in a hlan dawn a ni.
    C. Lalduhawma hi C. Lalpara leh Lalrintluangi te fapa mal a ni a, kumin April ni 2-a a thiante nen ram an kal haw lam chu Bethlehem Vengthlang leh Zemabawk veng inkalpawhna tura Chite lei dawhna tura lei laihkhuara tui tling, thuk tak-ah an inbual a, an zinga mi P.C. Laltlanhlua kum 11 chu tuiah hian a tla a, a chhanchhuahna lamah Lalduhawma hi chesualin, a thi a ni.. (AIR)

Kum 50-na tlin lawmna thisen an pe

2011-12-29T22:31:00.002+05:30

Baptist Chruch of Mizoram Thalai Kristian pawl kum 50 tlin lawmna kal zelah vawiin khan Mualthuam North TKP leh Sekhum TKP ten Lunglei Civil Hospital-a hman tur thisen unit 79 an pe.
Thisen petute hi Mualthuam North TKP branch-a mipa 32, hmeichhia 22 leh Sekhum TKP mipa 25 leh hmeichhia 5 an ni a, Lunglei Civil Hospital blood bank hnathawk ten Mualthuamah thisen hi an laksak a ni. (AIR)

Thane thlipuiin Chennai a nuai dâwn

2011-12-29T22:30:00.002+05:30

     Bay of Bengal tuipui cyclone thlipui ‘Thane’ inmun chu chak chho telh telhin tunah hian Chennai atanga Km 250 vela hlaah a awm mek a, Vishakhapatnam-a Cyclonic Warning Center sawi danin, thlipui hian thlang lam pan-in naktukah Chennai leh Nagapatinam a hrut rin a ni.
    Thane thlipui avang hian darkar 48 lo awm tur chhungin Andhra Pradesh-a Nellore leh Prakasam dist-ah te, ruah nasa taka a sur phah rin a ni bawk a, Rayalaseema dist-a Chittoor leh Cuddapah-ah te pawh ruah tam tham tak a sur rin a ni.
    Thlipui tleh tur avang hian sangha mantute chu tuipuia feh chhuah lo tura thurawn pek an ni a, Tamil Nadu leh Andhra Pradesh tuipui kam-te hi thli na tak, darkar 1-a Km 45 atanga 55-a chakin a tleh thei tih Met Dept chuan a sawi a, cyclone thlipui, darkar 1-a Km 90 atanga 110-a chakin a nuai thei tih a sawi bawk.

Burma-a kudam puakah mi 17 an thi

2011-12-29T22:29:00.002+05:30

    Myanmar ram khawpui hlui, Yangon-a tukin khawvar hmaa kudam engemawzat awmna hmuna thil chak tak puakah mi 17 an thi a, midang thahnem tak an hliam bawk.
    He thil thlen chhan hi hriat la ni lo mahse bomb puak erawh a ni lo niin sorkar official pakhat chuan a sawi a, heng kudam-te hi chi siamna damdawite leh in sakna bungrua chi hrang hrang dah khawmna hmun a ni .
    Thi zingah hian kang thelhtu pawl mi 3 an tel nia sawi a ni a, kangmei hi kudam pakhat atanga chhuak tanin riah nana hman, a bul hnaia thinga sak in-te chu chak takin a man kai a ni. Thudawn danin thil puakah hian kangthelh hna thawktu mi 30 tlein mi 79-in hliam an tuar a ni. (AIR)

Krismas ruai hlim takin kohhran hrang hrangin an theh

2011-12-26T23:07:00.003+05:30

    Kristiante hunpui ber Krismas lawmna ruai chu vawiin khan Mizoram hmun hrang hrangah theh a ni. Kumin Krismas chu Pathianni-ah a tlak avangin Seventhday Kohhran tih loh Kohhran tam zawk chuan vawiin hi ruai theh ni atan an ruat a, nimin lama lo theh tawh Seventhday kohhran thenkhatte pawhin vawiinah an nawn leh a, Kohhran thenkhat naktuka ruai theh chhunzawm tum pawh an awm bawk.
    Aizawl khawpui chhung kohhran tam zawk chuan vawiin chawhma lam khan Pathian Biak inkhawm an nei a, hemi hnu hian Pathian faka zaikhawmna hun pawh buatsaih a ni.
    Aizawl khawpui chhung Police Station hrang hrang huam chhungah buaina thleng sawi tur engmah a awm lova, boruak muanawm tak hnuaiah mipuiin ruai an theh thei a ni.
    Lunglei khawpui chhunga Kohhran hrang hrangte pawhin vawiin khan Krismas lawmna ruai an theh a. Ruai atan hian Bawng 95 vel, vawk 50 vel bakah Ar leh Sangha engemawzat siam a ni a, Sa mana Lunglei khawpui chhunga senral hi Cheng Nuai 40 vel ni tura ngaih a ni a, Thlaihnah leh bawlhhlo, Gas leh buhfai te nen vek chuan vawiin a senral hi a tlemberah Cheng Nuai 60 vel ni tura ngaih a ni.
    Kohhran hlim fal lutuk an awm lova, zanin hian Kohhran hun hman dan pangngai chu zo fel thawkhat tura ngaih a ni. Kristmas vuakvetah hian Lunglei Police te chuan Thana-ah Case ziahluh an nei lova. Police-te hian hmun sarih-ah duty-na siamin Lunglei khawpui chhunga veng tinah Police 2 zel dah an ni a, VDP leh YMA te nen inpawhtlang taka duty an indah chu a tangkai hle niin Police-te hian an sawi.
    Excise and Narcotics Deptt Lunglei pawhin vawiin thleng khan dan bawhchhia man pakhatmah an nei lo. Hetihlai hian Zawlaidi Vendor hi Lungleiah hmun 4-ah awmin Vendor pakhat chuan Kristmas boruak vuakvetah nimin thleng khan Case 40 chu an hralh tih a sawi.
    Lawngtlai khawpui chhunga Kohhran hrang hrangte pawhin Krismas ruai an theh a, Kohhran tam zawkte chuan Krismas thlen In atana an hman Kohhran Hall behchhanin ruai hi an siam a, chawhma lamah Kohhranhote chuan Krismas zaikhawm neiin hlim takin Pathian an fak a, Krismas ruai hi chawhnu lam dar 3 vel atangin theh tan a ni a, ruai atan hian Vawk leh bawng bakah, heng sate ei thei lo tan hian Kohhran tinte chuan an ei theih tur an ngaihtuahsak a ni.
    Nizan leh vawiin thlengin Lawngtlai-ah thil duhawm lo thleng hriattur a awm lova, ruai theh tura mipuiin an In an chhuahsan hlanin Police leh YLA-te veng tinah ngawrh takin an duty a ni.
    Kohhran hrang hrangin nikum aiin ruai theh an thahnem niin an sawi a ni. Zanin lamah Krismas lawmna chhunzawm leh a ni dawn a, Kohhran hruaituten Programme an lo duan lawk angin thupui thlanbik hmangin Kohhran hrang hrangah thusawi tura ruatten Isua Krista pianna lam hawi Pathian thuchah an sawi ang. Urlawk zan atanga vawiin thlengin nikum aiin Lawngtlai khawlai boruak a dai niin a hriat a, zu rui hmuh tur an awm lova, halpuah leh halmawi lam chi thawm hriat tur a awm lo bawk, hetiang a nihna chhan hi sawrkar khap thil mipuite’n an zawm that vang leh Police leh YLA lam an duty ngawrh vang niin a hriat.
    Saihaah chuan nimin khan kohhran pahnih khat ruaitheh an awm a, a tam zawk chuan vawiin hian an theh a ni. Krismas ruai hi naktuk lama chhunzawm tum an tam hle. Inkhawm boruak pawh a tha chhovin zai pawh a nuam sawt hle. Kohhran mipui Krismas ruai thehtu an thahnem hle a, kohhran chhunga damlo leh harsatna nei ruai theh thei lo leh hman lo in-report te chu chawhmeh tur pek vek an ni.
    Kumdang zawng aiin kumin Krismas-ah hian Saihaah boruak a ralmuangin a nuam a, Zu rui buai leh khawlai nun tinuamlo khawp thil thleng a awm meuh lova, Police station lam pawhin thil thleng lian tham leh thil tha report an lo an dawng lova, hei hi Kohhranho tawngtaina te, Magistrate, Police leh Tlawmngai Pawlte tan lakna vang nia ngaih a ni.
    Dist. khawpui dangahte pawh mipuiin hlim takin Krismas ruai an theh a ni.

NLUP rulhlet a ngai lo

2011-12-26T23:06:00.002+05:30

Finance Minister, H.Liansailova chuan, kum 2011-2012 chhunga NLUP atana hman tur sum, Central sorkarin Mizoram sorkar a pek, Cheng vaibelchhe 234 chu Special Plan Assistance (SPA) a nih avangin a pumpuiin Grant vek a ni a, Mizoram sorkar rulh let tur loan Cheng khat mah a awm lo a ni, a ti.
Hemi chungchanga kan corr. zawhna chhangin Finance Minister chuan, he sum hi Ministry of Finance chuan November ni 16 khan a sanction-a, hei hi Comprehensive and Integrated Socio Economic Development Project, NLUP atan liau liaua hman tura sanction a ni, a ti.
Line Department hrang hrang 8-te chanpual leh an hman dan tur pawh Central sorkar chuan a duang lawk nghal vek a ni, a ti a, chumi ang chuan Agriculture Department-in Cheng vaibelchhe 15, Industry Department-in vaibelchhe 90 leh nuai 19 sing 7 sang 2, Horticulture Vaibelchhe 17 nuai 33 sing 9 sang 4, Soil and Water Conservation Department-in Vaibelchhe 26 leh nuai 86 sing 5 sang 4, AH & Vety Department-in cheng Vaibelchhe 73 leh nuai 25 sing 4, Fisheries Department-in Vaibelchhe 9 nuai 80, Environment and Forests Department-in nuai 34 leh sing 4 leh Sericulture Department tan cheng Vaibelchhe 1 leh nuai 20 a ni a, a vaia belhkhawm hi cheng Vaibelchhe 234 a ni.

Local Council leh VC inthlan tur inbuatsaih mek

2011-12-26T23:03:00.002+05:30

    Nakum February thla tawp lama Aizawl Local Council leh District 6-a Village Council inthlanna neih tur atan State Election Commission chu a inbuatsaih chho mek a. Hemi chungchangah hian tun thla ni 29, Ningani khian inthlan buaipuitu turho huam zau takin an inhmukhawm ang a, ruahmanna an siam dawn a ni.
   Hetah hian District 6 - Aizawl, Kolasib, Champhai, Mamit, Serchhip leh Lunglei DC te, LAD, UD & PA Department aiawh leh inthlan hnathawktu tur te kohkhawm an ni ang.
   State Election Commission atanga kan Corr. thu dawn danin he inthlanna neih tur huam chin tur chu Aizawl Municipal Council huamchhunga Local Council 78 leh District 6-a VC 470 chuang an ni dawn a, VC inthlanna neih tur chungchangah hian sorkar atangin remtihna hmuh tawh a ni a, Local Council inthlanna neih tur chungchangah sorkar thu nghah mek a ni.
   Hetih lai hian VC inthlanna neih tur atan hian nakum January ni 1-a kum tling chin laa VC electoral Roll siam that hna chu thawh mek a ni a, thunbelh dil leh tih dik dilte dilna chu enfiah zawh tawh a ni a, tuna hmabak chu Electoral Roll thar siam tura a chhut chhuah hna thawh a ni a, VC Electoral Roll thar hi nakum January ni 10-ah peih fel a ni ang.
   Aizawl Local Council Electoral Roll siam hna pawh nakum January ni 1-a kum tling chin la bawkin tun thla ni 1 atanga khan thawh tan a ni a, tunah hian thun thar dilte enfiahna hearing veng tam takah zawhfel a ni tawh a, thun thar dilte dilna leh sawiselnate chin fel mek a ni a, he hna hi nakum January ni 6-ah zawhfel tum a ni a, heta tang hian Electoral Roll thar buatsaih hna thawh zui a ni ang a, Local Council Electoral Roll hman theih tur chu nakum January ni 18-ah peihfel tum a ni ang.

Karnataka CM hlui a thi

2011-12-26T23:01:00.002+05:30

Kum 1991-92 chhunga Karnataka Chief Minister ni thin, S.Bangarappa-a chu tukin zing khan a thi a, kum 79 a ni. Bangarappa-a hi a kal that loh vangin tun thla ni 8 khan damdawi inah dah luh a ni a, biak theih loa hun rei vak lo a awm hnuah a thi ta a ni. A ruang hi Bangalore-ah dah rih a ni a, naktuk hian an khua Soraba Taluk-ah a vuina hun hman a ni ang.
Sawrkar lam atangin External Affairs Minister S.M. Krishna, Union Law and Justice Minister Salman Khurshid, Prime Minister hlui Deve Gowda leh State Chief Minister Sadananda Gowda ten an ui thu an sawi a. Karnataka sawrkar chuan Bangarappa-a zahna lantir nan vawiin kha state sorkar chawl-ah a puang a ni.

Lokpal Bill thutawpna leh thutlukna

2011-12-26T22:59:00.001+05:30

Finance Minister Pranab Mukherjee-a chuan vawiin khan chanchinbute mite kawmin, Lokpal bill chungchanga thu tawpna leh thutlukna chu Parliament chiahin a siam thei a ni, a ti. He Bill chungchangah hian Anna Hazare-a pawlte nen pawh vawi tam an inbiak tawh thu a sawi a ni. Chutih mek laiin, Anna Hazare-a chuan naktuk atang hian ni thum chhung awh tur, MMRDA Ground-ah Lokpal Bill hman vat ngiatin, chaw a nghei leh dawn a ni.
Hazare-a pawlte chuan nimin khan Prime Minister Dr.Manmohan Singh-a leh MP engemaw zat hnenah lehkha thawnin, he eiruk dona tura dan duan hi a rang thei ang bera dana siam nghal nise tiin an ngen a. Minister of State for Parliamentary Affairs Rajiv Shukla-a chuan vawiin vek khan chanchinbute kawmin, Anna Hazare-a pawlte chuan dawhthei takin Lokpal Bill pawmna chu lo nghak se, a ti bawk, a ni.

Miretheite tan chaw man tlawmin

2011-12-22T23:21:00.000+05:30

Ramchhunga mirethei zawk-ten buhfai, wheat leh chaw lam chi, man man zawka an lei theihna tur, Food Security Bill chu vawiin khan Lok Sabha-in a pass a, ramchhung mipui zaa 63.5-in an chhawr tangkai theih tur bill hi Food & Consumer Affairs Minister KV Thomas-a’n a put lut a ni.
He bill-in a tum ber chu miretheiten hnianghnar taka buhfai, wheat leh thil dang quality tha, man tlawm zawka lei tir a ni a, thingtlanga cheng mi zaa 75 leh khawpuia mi zaa 46 tal, tuam tum a ni. He bill hnuaiah hian chhungkaw thlanchhuah bikte chu buhfai Kg 1-ah cheng 7, wheat Kg-ah cheng 2 leh buh hum Kg-ah cheng 1-in thla tin Kg 7 dawn tir a ni ang a, chhungkaw pangngai-ah mipakhatin thla tin Kg 3 aia tlem lo an dawng ang.

Pension tawh rawihnawn an duh lo

2011-12-21T23:34:00.000+05:30

     MZP leh MSU chuan thuchhuah siamin, Mizoram Sorkar hnuaia hnathawk reng reng pension tawh rawih chhunzawm leh rawih nawn hi tha a ti lova, a duh ngai lo a ni. Amaherawhchu tul bikna thil leh hun laklawh avanga sorkar hnathawk thenkhat hun engemaw ti chhung rawih chhunzawm leh rawih nawn lailawk an ni thin erawh zirlai pawl chuan hriatthiamna thui tak a nei thung.
        Hun rei tak kalta atang khan Mizoram sorkar chuan Department hrang hrang a a hnathawkte an pension tawh hnu pawh a rawih nawn leh rawih chhunzawm a lo nei nual tawh thin a, rawih nawn leh rawih chhunzawm thenkhat te chu sorkar inrel bawlna kal lai mekin a mamawh em em leh hun laklawh, a bikin financial year kal laklawh lai ah phei chuan zirlai pawl mai ni lo mipui nawlpui te pawhin kan hrethiam tlang hle thin niin a lang. Chutih rualin tul bikna em em pawh awmlo leh induhsakna uchuak tak avanga mi thenkhat rawihnawn tun thleng a an la awmfo mai hi hriatthiam harsa kan tiin zirlai pawl leh mipui nawlpui te pawhin a kan duhloh leh kan dodal thin chu a ni.
        Mizoram sawrkar hnuaiah hnaruak a tlemin thangthar lehkhathiam tam tak kan chhuah mek lai a, pension rawih nawn a ni leh thin leh service pawhsei a awm leh thin hi zirlaite leh thangthar lehkhathiamte chanvo chhuhsakna leh rahbehna ah MZP leh MSU chuan a ngai a ni.
        Tun hnaiah Pu P.Chakraborty, Law Secretary pension chu Mizoram sawrkar in kum khat (1) atan Principal Legal Adviser, Law & Judicial Deptt hnuai a a rawih nawnna chu duh tawk lovin, thla ruk dang atan a pawhsei sak leh a, hei hi zirlai pawlte chuan tha a tih loh zia mipuite hriattir in kan lo lantir tawh a ni. Hemi chungchangah hian Mizoram Judicial Service Association hruaitute pawh kawm an niin, Pu P. Chakraborty a awm loh avanga Law Department-in harsatsa an tawh loh tur thu leh a tello pawh a Law Department a kal theih tho tur thu zirlai pawl hruaitute hnenah hian an lo sawi a ni.
        Tin, T.P. Khaund IAS (Rtd) pawh Principal Adviser, Govt. of Mizoram ah tiam chin pawh awm lo in 1st January 2009 atangin Mizoram sawrkar in a ruai nawn leh pawh hi zirlai pawlte chuan hriatthiam harsa kan ti hle a, a rang thei ang bera rawih nawn a nihna hi titawp turin sawrkar kan ngen tak meuh meuh bawk a ni. Tin, rawih nawn a nihna chhan hi mipui hnena hrilhfiah turin sorkar kan ngen in kan phut bawk a ni.
        Tin, heng bakah hian kan hriat theih chinah a chunga kan tarlan te tiamin pension rawih nawn mi paruk (6) leh service pawhsei sak mi sawm pasarih (17) an awm mek a, an hming pawh kan han thil tel nghal e. Hengte hi chhan leh vang tha tawk a awm a nih loh chuan tih tawp nghal ni se MZP leh MSU chuan a duh in, a rang thei ang ber a hemi chungchang a hma min laksak turin kan ngen tak meuh meuh che a ni.
        TIn, MZP President Pu James Thanghmingmawia chuan “zirlai pawlte hian tu sawrkar mah a cho lo a, a cho ngai dawn lo bawk a, amawherawhchu zirlaite leh ram leh hnam tan a nih chuan englai pawh in zirlaite chu thawkchhuak turin kan inpeih reng a ni” a ti a.Ram leh hnam tan chuan a tul hun a sawrkar thawpui a, a tul chang a kalh a ngaih chang a awm thin thu a sawi bawk a ni.

School kum 100-na an lawm

2011-12-19T22:48:00.000+05:30

    Cherhlun khawtlang chuan an khuaa zirna school an neih kum 100-na ni 15 – 16th. Dec., 2011 khan an lawm.
    Cherhlun khuaah hian kum 1911 ah Primary School hawn a ni a, kum 1949 thleng khan Mission hnuaiah awmin 1950 atang khan sorkarin a enkawl a, Primary School an neih hnu kum 50 (kum 1961) ah Middle School dinin a hnu leh kum 4-na ah High School an din leh a, tunah chuan Primary School 3, Middle School 2, High School 2, Higher Secondary School 1 leh Kohhran din English Medium School pakhat a awm.
    An khaw mi leh sa Matric leh a chunglam First Division leh a aia sanga passed mi 27 hnenah chawimawina thuziak an hlan. Zirna kum 100-na (Centenary) lawmnaah hian bialtu MLA John Siamkunga chu khuallian a ni a. Centenary Souvenir tlangzarhin lungphun a hawng bawk. R. Rohnuna, SDO (C), C.Lalbiakzauva, SDEO Hnahthial leh R.Laldinliana, BRC Co-ordinator, SSA ten an hmanpui.

Mizo khua sahhek a, Tuikuk leh Chakma pek tum pawi an ti

2011-12-19T22:42:00.002+05:30

    MZP chuan Mizoram sorkarin khaw thenkhata Mizo khua sat hek a hnamdang - Tuikuk leh Chakma te tana Village Council hran pek a tum chu pawi a ti tak zet a ni.
    MZP chuan VC then hran ngawr ngawr hi a dodal a ni lo a, amaherawhchu ram leilung fa ni lo hnamdangte tana a bila VC pek hi tha lo a tiin, him lohna tam tak awm thei ni in MZP chuan a ngai a ni.
    Hnamdangte tana VC thar pek tumna khua te chu - Thanzamasora, Sedailui leh Teirei khua te ni a hriat a ni a. Heng mite kuta Village Council thuneihna pek a nih chuan ramngaw humhalh kawngah leh ram leh hnam humhalh kawngah nasa takin harsatna a thlen thei dawn niin MZP chuan a hria a.
    Hun hmasa lamah te pawh chutiang ang thil a lo thlen tawh thin avangin hnamdang kuta VC thar pek tumna awm mek hi ngaihtuah nawn ni thei se MZP chuan a duh in sorkar thuneitute pawh a ngen tak meuh meuh a ni.
    Tunhnaia Staff Selection Commission ten sipai hna hrang hrang an lak turah Mizo thalai ten kan chanvo(qouta) kan luah khat zo lo fo thin chu MZP chuan ngai mawhin Mizo thalai tam zawk kan luh theih nan hma a la chhunzawm zel a, form la chhuak zawng zawngte December, 2011 thla chhunga MZP General Headquarters-a thehlut turin a ngen a ni.

North Korea ram hruaitu lu Kim Jong Il a thi

2011-12-19T22:39:00.000+05:30

     North Korea ram hruaitu lu ber, Kim Jong Il-a chu kum 69 mi niin Inrinni khan a thi a, thuneihna pumhmawmin kum 10 chuang khauh takin ro a rel a ni.
   A thih thu hi vawiin khan Pyongyang-a sorkar television-ah puan a ni a, amah hi zunthlum leh lung thalo nei niin Inrinni kaltaa high Intensity Field inspection nei tura a kal laiin rel chhungah lungphu chawl-in a thi a ni.
   Sorkar news agency KCNA-in a sawi danin, Kim Jong-il hi tun thla ni 28-ah Pyongyang-ah vuiliam a ni ang a, ni 29 thleng sunna hun hman a ni ang. A aiawh tur hian a fapa 3-na, Kim Jong Un-a ruat a nih rin a ni.

Mizoramah AIDS avangin mi 252 an thi tawh

2011-12-17T23:14:00.000+05:30

Kum 1990 October thlaa Mizorama HIV/AIDS hrik pai hmuhchhuah ve a nih atanga kumin October thla thleng khan HIV/AIDS hrik pai Mizoramah mi 6,399 hmuhchhuah a ni tawh a, AIDS vangin mi 252 an thi tawh a ni.
Mizoram State AIDS Control Society hotute hnen atanga thudawn danin HIV hrik pai zinga 5,024 te hi mipa an ni a, 2,375 te chu hmeichhia an ni a. Mipat/hmeichhiatna hman avanga kai hi za zela 64 point 8 an nih laiin damdawi hman sual chin avanga hriau leh syringe inhman tawm avanga kai chu za zela 28 point 5 an ni a. Nu-in a nau pai a kai chhawn vanga HIV hrik pai hi 236 an ni a, chu chu HIV pai zawng zawng atanga chhutin za zela 3 point 7 a ni.

Khawvawt avangin mipui an buai

2011-12-17T23:01:00.002+05:30

    Khaw vawt na takin ramchhung hmar lam state-te a tuam mek a, Jammu & Kashmir leh Himachal Pradesh hmun sang lamah nasa taka vur a tlak avangin Punjab, Haryana, Uttar Pradesh leh state dangah boruak a tivawt zual hle a ni.
    Delhi khawpui pawh a vawt hle a, zing lamah chhum leivak chhak tak a zin thin avangin kalkawng pawh a hmuh that hleih theih loh a ni. Uttarakhand-ah pawh khaw vawtin khawsak phung pangngai, nasa takin a tikhaihlak a, mi tam tak an damloh phah a ni. Met Dept sawi danin, Kumaon Division-a Mukteshwar-ah chuan nizan khan a vawh lai berin celcius degree 2.6 a ni a, khaw vawt zualpui hi a la reh mai dawn lo niin Met Dept chuan a sawi bawk.
    Kashmir Valley-ah chuan zan lamah a vawh lai berin celcius degree minus 4 hnuai lam a ni deuh reng tawh a, dil hmingthang tak, Dal Lake-a tui pawh a khang titih tawh a ni. AIR Srinagar Corr sawi danin, pipe-a tui khang leh electric current mumal lovin mipui harsatna a belchhah a ni. Chandigarh, Punjab leh Haryana-te pawh a vawh lai berin degree 5 a ni tlangpui a, a vawhna ber, Jalandhar bul Adampur chu celcius degree 0.7 niin Haryana-a Ambala-ah degree 1.9 a ni a, Amritsar pawh a vawh lai berin degree 2.6 a ni.

Philippines tuilianah mi 140 an thi

2011-12-17T23:00:00.001+05:30

Thlipui leh ruahpui thawk avanga Philippines-a tuilianah mi 140 vel an thi a, midang engmawzat chin hriat lohvin an awm bawk. Thi zinga a tam ber chu an ram chhim lam, Mindanao thliarkar-a Iligan khawpui leh Cagayan de Oro chheh vela mi an ni a, mi sang tam takin an chenna tlanchhiatsan-in hmun him lamah an insaseng tawh a ni.
National Disaster Rescue Agency hotupa, Benito Ramosa’n a sawi danin, report dawn belh zel anih avangin thi zat hi a pun chhoh rin a ni a, darkar 24 chhung, ruahpui vanawn sur-in lui kuang a nan chhe nasa hle a ni.

Loneitute hman tur Identity Card tlangzarh

2011-12-17T08:28:00.000+05:30

Nimin chawhma dar 11:30 khan Pu S.Laldingliana, Parliamentary Secretary chuan Agruculture Farmers Conference Hall Lungleiah Loneitute hman atan Identity Card tlangzarhna hun a hmanpui.
He hun hi Pu R.Lalnunzira, DAO Lunglei in kai hruaiin, Pu S.Laldingliana chu khuallian a tan a hman ani.Khuallian Pu Dinga chuan thusawina neiin kut hnathawk te chu he card hmang hian theihtawp a hma inlak zel ka beisei ani ati. Tin Central in Mizoram kut hnathawk te min duhsakin India rama State zawng zawng ten an dawnve theihloh lawmman Pakhatna kuthnathawh ah kan dawng hi a lawmawm hle a ni a ti. Tin tunlai hian thudiklo lengvel ah hian inbuailoh ka duh ani ati bawk, kan sawrkar hian mirethei te hi chhanchuah a duh a Central pawhin min tuipui em em a ni a ti.

Vawiin ah hian NLUP hmang hian ei leh bar a kan intodelh loh na hi tihbo kan tum a, chuvangin NLUP dawngtu te pawh hian tipuitling ngei ngei turin inthawh a pawimawh ani ati bawk.Tin, Mizoram leh Bangladesh insumdawn tawn na tur pawh tun ah hian kapui zel niin, reilo teah hian kan hman thuai kan beisei ani ati.Pu Dinga chuan chhim lam ah pawh insum dawn tawnna turin Mizoram sawrkar chuan hma chak taka la zelin kawngpui hi kan lai chhomek a, reilo te ah hian hei pawh hi kan hman thuai kan beisei thu a sawi bawk. Hun reilo te ah hian chhimlam hian nasa takin kan sawrkar hmalak na a zar ah kawlhi a eng thuai ang tih hi i beisei tlat ang u ati bawk. Tin, Pu Dinga hian thu a sawi zawh hian NLUP hmanga lo neitu te hman a tan Identity Card a tlang zarh nghal bawk ani.
He hun ah hian Pi Baby Lalremkimi Agri. Extension Officer chuan Technical report pein Pu B.Lalkhuma SDAO chuan lawmthu sawina a nei bawk.

Carl Froch-a`n Andre Ward a vau lawk

2011-12-15T23:26:00.000+05:30

Boxer Carl Froch chuan Inrinnia New Jersey-a world-title unification fight-a a hmachhawn tur Andre Ward chu mawi lo taka a che a nih chuan a thungrul tur tawkin a che ve ang tiin a vau lawk. He Nottingham fighter hian Super Six final-ah hian WBC super-middleweight title a dahkham ang a, Ward hian WBA title a dahkham dawn bawk a ni.

Kum 34-a upa Froch chuan, “Fighter phakar tak a ni a, a chhan chu a thluak hmanga mi hneh a tum thin a ni. Mawi lo taka a che a nih chuan a tih anga tih ve mai chu ka tan a nuam khawp ang,” a ti. Ward hi mi 24 a tum tawhah hneh loh la nei miah lo a ni a, mi 13 a knockout tawh bawk. Tunhnaia a hneh langsar tak chu Mikkel Kessler a ni a, hei hi Froch hnehtu awmchhun a ni. An inhnek tum khan Kessler chuan American Ward hi referee hmuh loh hlana a kiu hmang thin leh a lu-a mi tauh chingah a puh a ni.

Carlos Tevez-an England-a awm a duh tawh lo

2011-12-15T23:18:00.000+05:30

AC Milan leh PSG target Manchester City striker Carlos Tevez chuan England-a awm a duh tawh lo tih sawiin a naupan laia a club Boca Juniors-a kir leh chu a duh ber thu a sawi. Kum 27-a upa Tevez hi tarlan tawh angin Roberto Mancini nen an inkar a chhia a, Champions League-a Bayern Munich laka an tlawm hnu khan a club tan hian a la khel leh miah lo a ni. AC Milan leh PSG bakah Brazilian Serie A champions Corinthians te chuan Tevez an duh thu an sawi lang vek tawh a, mahse a duh ber erawh Boca Juniors a ni thung. Gente hnenah Tevez chuan, “Hlawh tihtlem pawh nise pawi ka ti lo. Zinkual reng hi ka ning hluah hluah tawh. England-ah chuan ka kir tawh dawn lo. Pre-season pawh Boca zinga khelh ka duh a, Copa Libertadores pawh an zinga khelh ka duh,” a ti. Tevez hian hetiang hian sawi mahse Boca lam chuan tunhma lam deuh khan Tevez leina tur sum an neih loh thu an lo sawi tawh a, Tevez hi Euro maktaduai 40 vel lai man a ni.

Hetihlai hian AC Milan chuan Tevez hi duhtu dang awm mahse player inchuha inelnaah luh an tum loh thu an sawi. Tarlan tawh angin Milan hian loan-a lakchhuah phawta chumi hnua a ngheta lei leh an tum a, hetihlai hian PSG chuan tuna lei nghal mai an ngam thung a ni. Milan vice president Adriano Galliani chuan, “Kan offer hi final a ni nghal mai. Offer tha zawk an (PSG) siam a nih chuan kan counter dawn lo,” a ti.

Pawngsual chungchangah thil mak tak an haichhuak

2011-12-14T00:57:00.000+05:30

    Tun thla ni 10 zana Lunglei Electric Venga pawngsual chungchanga thil awm dan chu nimin khan Lunglei Police ten an chhui chhuak ta a, Case IO Ramnunmawii leh SDPO Vanlalliana ten he thil hi chhuiin thil mak tak inphumru an haichhuak.
    Tun thla ni 10 zan khan Zaithanpuia (21) tui phur chuan Lunglei Electric Vengah tui a pe a, a tui pekna bul lawka hmeichhe naupang Kum 14-a upa, a nau hmeichhia nena lo kal chu, ‘Lo kal rawh u, tiin a thlem a, hmeichhe naupang pahnih hian a Papuia te Ina Uite an lak tur thu leh an hman loh thuin an chhang a, an kal ta a, an lo let leh chu Zothanpuia hian lo kal rawh u, a ti leh a, hmeichhe naupang Kum 14 chuan Zaithanpuia hi panin an tui pekna bul lawkah chuan a pawngsual ta niin SDPO Vanlalliana chuan a sawi.
    Case IO SI Ramnunmawiin thil awm dan a chhui nghal a, a thil chhui chu a duhtawk deuh mai laiin SDPO Vanlalliana chuan hemi phenah hian thil awm awm tlatin ka ring, Rami chhui zel teh a ti a, tichuan hmeichhe naupang hi an ko va, SDPO in nimin khan thiam taka thu zawtin, ‘I pa hian vawi 10 em ni a tih tawh che kha,’ a ti a, hmeichhe naupang chuan vawi 4 a ti a, thil chhuitute chuan an thil hriat chu mak an ti hle a, niminah vek hmei-chhe naupang pa Thangliana (37) S/o Kapliana (L) hi ko vin thil awm dan an zawt a, a fanu thu an zawh hmasak avang leh a pain tum li lai a pawl tawh thu a sawi avangin a pa hnenah chuan ‘I fanu hi vawi engzat nge i pawl tawh’ tiin an zawt let ve a, ani chuan vawikhat chauh a pawl thu a sawi a, vawikhat a ni emaw vawili a ni emaw a pa hian a lo khuaikhem thin tih nimin khan an hre ve leh ta a ni.
    Tichuan pawngsual tupa Zaithanpuia leh hmeichhe naupang pa hi Jail-ah dah thlak an ni ta a ni.
    Thangliana hi a nupuiin midang a umsan hnuah a fanute pahnih nena khawsain Mombati an siam \hin a, a fanu hian a bula mut an la duh tlat avanga Khum danga an la mut loh thu leh an mut dun avanga a fanu hetianga khawih ta mai hi a nih thu a sawi laiin a fanu Police ten thil awm dan an zawhfiahnaah chuan ‘Kei hi Khum hrangah ka mu tawh a, ka pa leh ka nau hi Khum khatah an la mu a, ka pa hi ka Khumah lo kalin min pawl \hin a ni,’ a ti.
    A pain a pawl laiin a nau hmeichhia chu a mut tui thin em avanga engmah a hriat ngai loh thu Kum 14 mi hian Police te hmaah a sawi.
    Hetiang a nih avang hian Zaithanpuia`n a pawl dawn pawh hian a tang em em lo niin an sawi.

Meidum-ah Gas tam tak an hmuchhuak

2011-12-13T00:20:00.000+05:30

    Kolasib District-a tuialhthei leh gas zawnchhuah hna thawktu Oil & Natural Gas Corporation Ltd, ONGC chuan Meiduma an leiverhna Hortoki pakhat khurah gas tam tham tak a awm tih an hmuchhuak tawh.
    Tun dinhmunah gas awm zat leh eng anga thukah nge hmuh a nih ONGC chuan a la sawi rih lova, an company Chief Geologist Chandan Chakraborty-an thu kimchang an la pechhuak thei lo tih a sawi a, amaherawhchu leiverh hna an zo tawh a, fumfe taka Production testing an tih hnu-in he khurah hian Gas tam tawk a awm ngei tih an hria tih a sawi a, felfai zawka finfiah hna thawh mek a ni a, ni 15 hnu velah chuan thu kimchang puan theih an inbeisei tih a sawi a ni.
    ONGC hian thu lawmawm an neih hi official takin la puang theilo mahse, gas a awm ngei tih hriat a nih tak hnuah Meidum Exploratory Well-ah khawl hrang hrang lakhawmin an inpuahchah nasa hle ni a thudawn a ni.

Second Hand godown a kang

2011-12-13T00:18:00.000+05:30

    Nimin tlai dar 4 vel khan Aizawl Chhinga Venga ABC lane-a second hand zuarte godown atana hman lai Ralkapthangi In (hi Assam type Concrete ruhrel) chhawng 2 a sang chu a kang a, secondhand Bungraw tam tham tak a kangchhia.
    Kangmei hi tunah a la rem fel lova, amaherawhchu kangmei nasa zual te thelh a ni tawh a, he thil thlengah hian thi leh hlaim erawh an awm lo..
    In kang hi Ralkapthangi In a ni a, kangmei hi inhnuai Basement atanga chhuak tan a ni a, he In hi Assam type Concrete ruhrel secondhand dahna a ni a, he thu buatsaih lai hian kangmeiin a bungrua a tihchhiat zat hi hriat theih a la ni rih lo.

Hazare-te hian Politics an khel a ni - Cong. Party

2011-12-13T00:15:00.003+05:30

    Congress Party chuan Anna Hazare-a leh a hote campaign chu hlemhletna do letna ni lovin politics khelhna a ni, a ti.
    He thu hi an party Gen Secy Digvijay Singh-a’n Parliament pawna thuthar lakhawmtute hnenah sawiin Team Anna thil tum ber chu sorkar laka boruak tha lo siam a ni, a ti.
    Team Anna member-te chu UPA kaihhruai sorkar laipui leh Cong sorkar-na state-te beia BJP sorkar-na state-a eirukna erawh hmuh kan-ah puhin Rahul Gandhi-a an bei bik pawh na takin a sawisel a ni.
    Cong MP Sanjay Nirupam-a pawhin Team Anna-in Lokpal Bill chu Parliament session hnuhnung bera resolution lungrual taka pass behchhan a ni tur a nia tia an sawi chu ram mipuite, a ni lo lama kaihhruai tumna niin a sawi a ni.

Ramdang mithiam, India-a hnathawka an lo luh theihna tur bill 3 passed

2011-12-13T00:15:00.000+05:30

Thiamna bik nei India mi-te, ramdanga hna an thawh theihna tur leh ramdang mithiam, India-a hnathawka an lo luh theihna tur bill 3 - Chartered Accountants (Amendment) Bill 2010, Company Secretaries (Amendment) Bill 2010 leh Cost & Works Accountants (Amendment) Bill 2010-te nimin Rajya Sabha inkhawmah pass a ni a, heng bill 3, a ruala sawihona hun tawite neihah member-te zawhna chhangin Law Minister Veerappa Moilly-a chuan Chartered Accountant zirna in leh auditor-te, international standard pha tura buatsaih a pawimawh tih a sawi a, heng bill 3-te hi service sector siamthatna tur atan an pawimawh hle dawn a ni, a ti bawk.

Isua avangin kekawrtlawn a ha duh ve ta

2011-12-11T18:54:00.000+05:30

    Budhhist Puithiam (Bante), Uansa (mok hnam) kum 25 vela upa Chawngte Budhist Mandir-a kum 6 lo thawk tawh chuan Kristiana awm a duh thu Chawngtea a Missionary te hnenah a sawi a, he Puithiam hi Borkoloka thawktu Amarsingh Chakma, Lunglawn Shalom Kohhran te rawih lai nen Pathian thuin an lo inkawm tawh thin a, tun tumah hian a awmnaah chuan beidawngin a rawn inpe tawp mai an ti.
    A puithiam thawmhnaw te nen thlate lakpui a nih hnuah a puithiam kawrfual pawh Mandirah hian Puithiam lian hnenah a pe a, thawmhnaw pangngai a lo neih loh vangin Chawngte 'P' kohhran hoten an lei sak a, kekawrtlawn ha ngai miah lo khan Isua vangin Kekawr tlawn te a ha ve ta a ni.
    Nimin khan Udalthana Biak In hawn zawhah Baptistma Rev R.Lalrintluanga Co-ordinator Mission Dept.BCM chuan a chantir a, he Puithiam hian a testemony a sawi naah Sakhua Hahchawlhna leh Thlamuanna awm thu hi an sawi ka hre tawh a, chu chu Kristian ten in rin Isua Krista hian a lo nei tih ka hria a, a hnenah hian ka chawl ve ta a ni a ti a, a rual hian ringthar 5 ten an chang ve nghal a, nimin vek khan Bazar Bial Mission Comt. te bul tum camping neiah Zohmunah mi 21 M.Rodingliana Evangelist in a chantir a, an zingah hian Bawlpu a tel, Phairuangkai Bethelah Lungmuana Evangelist bawkin a chantir bawk a, tunlai hian BCM Kohhran hrang hrang ten ramchhung leh pawnah Workcamp leh Camping-in hun an hmang reng a ni.

Cheng nuai 108.07 senga sak Tlabunga Border Trade Facilitation Centre a hawng

2011-12-11T14:09:00.000+05:30

    Niminpiah chhun khan cheng nuai 108.07 senga sak Tlabunga Border Trade Facilitation Centre chu Lalrinliana Sailo, Trade and Commerce Minister, Government of Mizoram leh Dipankar Talukdar, State Minister for Chittagong Hill Tract, Government of Bangladesh ten a rualin an hawng dun a, hemi zawh hian Kawrpuichhuah a inthianthatna lungphum “India-Bangladesh Shared Vision of Peace, Prosperity and Partnership” lungphum chu an hawng dun bawk. Hei bakah hian Kawrpuichhuah BSF camp-ah Lunglei Civil Hospital a thawktu ten Free Health Clinic an buatsaih chu Talukdar-a hian a hawng nghal bawk a ni.
    Tlabunga Trade Facilitation Centre hi kum 2008, November ni 4 atanga sak tan niin a sakna sum hi Sawrkar Laipuia Ministry of Commerce atanga hmuh a ni a, Technical Sanction amount chu Rs. 1,00,84,521.12 niin Trade Facilitation Centre sakna atana work order amount chu Rs. 69,01,501.76 a ni a, a satu contractor hi Lalhluna, Khawruhlian niin chhawng li a sak a ni a, basement floor hi staff quarters atana sak a ni a, ground Floor-ah hian showroom paruk leh inthiarna(toilet) changtlung tak a awm a, first floor-ah hian Conference Room, Lounge, Staff room, Officer-in-charge room bakah inthiarna a awm a, a chhawng chung berah Guest Room pathum, Choka (kitchen) leh chaw eina (dining room) te, Store room te a awm bawk a ni.
   Trade Facilitation Centre hawn anih hnu hian lawnglenga chuangin Kawrpuichhuaha inthianthatna lungphum “India-Bangladesh Shared Vision of Peace, Prosperity and Partnership” lungphum chu an hawng dun leh a, Rinliana chuan Sawrkarin ram pahnih inkara inthianthatna tha zawk a awm zel beiseina leh insumdawn tawnna kawngah te inlaichinna tha zawk a awm zel a beisei thu te leh, thangthar lo awm zel tur te pawhin ram pahnih inlaichinna tihthat kawngah theihtawp an chhuah zel a beisei thu a sawi a, helai hmun hi pipute hun lai atanga insumdawn tawnna atana an lo hman tawh thin anih thu leh tihhmasawn thar tura ruahmanna siam ani chu lawmawm a tih thu a sawi bawk.
   Inthianthatna lungph um hawn anih hnu hian Bangladesh Minister Dipankar Talukdar hian Kawrpuichhuah BSF Camp a Lunglei Civil hospital a thawktu ten Medical Free Clinic an buatsaih chu a hawng nghal bawk a ni. He health clinic ah hian Health Minister Lalrinliana Sailo chuan India leh Bangladesh inlaichinna chu tun hma zawng aia a that tawh thu a sawi a, ngaihtuahna thuhmun hmanga hmalam hun tha zel tur beiseina avangin lung an phun dun tih pawh a sawi a ni. He camp ah hian malaria laka mipuite an in ven theih nan thosilen 200 sem a ni a, thosilen 100 hi Health Minister Lalrinliana Sailo-in Bangladesh-a Thekamukh VCP hnenah a hlan a, Bangladesh Minister Talukdar hian Kawrpuichhuah VCP hnenah thosilen 100 a hlan ve bawk a ni.
   He Trade Centre hawnna inkhawmah hian Nihar Kanti Chakma, AH&Vety
Minister, S.Laldingliana, Parliamentary Secretary, Joseph Lalhimpuia, Vice-Chairman, HPC Lunglei, Esther Lalruatkimi, Secretary Trade & Commerce, V.Sapchhunga, IAS D.C., Lunglei bakah mipawimawh thahnem tak an tel a ni.

AMRI Hospital kangah mi 73 an thi

2011-12-09T20:48:00.000+05:30

    Tukin zinga Kolkata, AMRI Hospital-a kangmei chhuaka thi zat chu he thu buatsaih lai hian mi 73 an tling tawh a, thi zinga mi 70 chu damlo enkawl lai niin, a dang 3 chu staff an ni.
    Helaia AMRI Hospital-ah hian building 2 a awm a, a building thar zawkah kangmei hi a chhuak a ni.
    Kangmei hi zing dar 3:30 vel khan hospital bula chengte’n an hmu a, security guard-te leh kangthelh motor-te nen thelh ni mahse, kangmei hi a darh chak hle a sawi a ni a; thi te hi an mahnia in-saseng thei lo, ICU, ICCU, Intensive Therapy Unit and Critical Care unit a mi te an ni.
    Chhawng 7-a sang, kang-mei chhuahna zawk , annex building-ah hian damlo 150 admit an ni a, heng zinga 90 chhanchhuah an ni.
    West Bengal CM Mama-ta Banerjee pawh zingkar khan a hmunah kal nghalin, AMRI Hospital registration a cancel sak nghal a, he Damdawi In neitu 2 , RS Goenka leh SK Todi-te chu Kolkata police hnena inpe tura tih an ni.
    West Bengal Health Minister Supid Bandhyo-padhyay chuan, he Damdawi In-a kangmei laka invenhimna a awm mumal lo chu mak a tih thu a sawi a, AMRI Hospital-a Senior Vice President Dr S Upadhyay erawh chuan ka-ngmei laka invenna hmanrua a awm thu a sawi thung.
    Kangmei chhuah chhan tak hi hriat a la ni rih lova, PM chuan thi chhungte, zangna-dawmna cheng nuai 2 theuh a pek dawn thu a puang a; tin, zangnadawmna cheng nuai 5 theuh thi chhungte pek an nih tur thu, AMRI Hospital thuchhuah chuan a tarlang.
    Mizoram atanga dam lo thahnem takin inenkawlna tura an pan, he AMRI Hospital-a kangmei chhuah hian Mizoram atanga damlo admit mekte chu an him vek niin, Kolkata Mizoram House Senior Liaison Officer Talo Rosanga chuan a sawi.
    Mizoram atanga kal dam lo 8 an awm a, thi leh hliam an awm lova, damlo te chu Old Ballygunj-a Mizoram House-ah dah an ni a, a dangte chu AMRI Damdawi In dangah suanluh an ni.
    AMRI Hospital hi Mizo-ram sawrkarin natna khirh leh Mizorama enkawl hleih theih lohte enkawl theihna tura a pawm zinga mi, dam lo tam takin an pan reng a ni.

Seat pawh sa mi-sualin an lo hralh!

2011-12-09T20:43:00.001+05:30

Saikuti Hall-a Krismas Bazar siam mekah mi tuin emaw a lo pawh fuh tawh, a la sak mai loh chu nimin leh vawiin khan misualin an ta anga chhalin midang hnenah an lo hralh a, hei hi hriatchhuah a ni a, mi eng emawzatin buaina an tawh phah mek.Hei vang hian Bazar Seat pawt fuhtute fimkhur a, an seat pawh sa, sa thuai thuai turin thuneituten an hriattir a, misual seat hralh ringawttute hi hriat thawi an ni a, tunah hian Police ten an zawng mek a, mi 3 vel an nih thu an sawi.

MizoramahAcademic Session thlak rih lo vang

2011-12-09T20:41:00.002+05:30

     Sikul kum (academic session) tihdanglam chungchanga vawiina sorkar thuchhuah chuan Academic Session hi thlak dawn pawh ni se, 2012 a school hawn leh luh hun chu a pangngaiin a awm phawt dawn nia sawiin, thlak danglam a nih dawn pawhin kum 2013 April thla atanga bul tan chauh a ni ang a ti.
    Sorkar thuchhuah chuan thlak hian nghawng thui tak a neih dawn avangin uluk taka ngaihtuah a ngai a, session hi thlak thut a nih chuan zirlai leh nu leh pa tan harsatna a siama thei. Phai lam a zirlai leh Mizoram pawna zirlaite pawhin harsatna an tawh lohna turin ruahmanna fel tak buatsaih a ngai. Thlak dawn pawh ni ila, nakum April thlaa \an tur chuan Jan, Feb. leh March thla chhunga zirlaite awm dan turah remchan lohna leh dinhmun laklawh tak a awm dawn a ni, thuchhuah chuan a ti.
    Mizoramah April atanga a kum leh March thlenga Academic Session neih ve tura sawirik a nih hnuah mi tam tam tak ngaihven a hlawh a ni.

Sports Minister-in Thuamluaia Mual a tlawh

2011-12-09T20:40:00.000+05:30

    Sports Minister Zodintluanga chuan vawiin khan LDSC Ground No-2 leh Thuamluaia Mual a tlawh a, LDSC hruaitute leh MJA te bakah Party lama hotute an tawiawm.
    Minister chuan LDSC Ground No-2 a Tennis Court, Volley Ball Court leh Basket Ball Court hawi zawng dik lo chu siamthat theih a nih tawh loh thu leh a nih ang anga hman a nih tawh mai tur thu a sawi a, helai hmuna SAI nau-pang 40 dah tur chu nakum Jan.15-18 ah an luh kim theih a beisei thu a sawi.
    |huamluaia Muala Grass phahna tur an buaipui mek chu chak taka kalpui zel a nih tur thu sawiin, ‘Tunah hian Side Drain khawihtu tur ruahman fel a ni tawh a, rei lo teah Side Drain hi khawih a ni ang,’ a ti.
    Minister chuan Serkawn Mual chu Stadium puitling tura ruahman a nih thu a sawi chhuak a, tunah hian pawisa Vaibelchhe 30 vel dah a nih thu a sawi bawk.

AIR Lunglei Music Award dawngtute

2011-12-08T21:22:00.000+05:30

Zanin khan AIR Lunglei FM Music Award chu Saikuti Hall-ah ropui taka sem a ni ta a, Hall khat tlatin mipui an kalkhawm a ni.
Lawmman dawngtute chu:

Best Gospel artist
Male - Vanlalsailova
Female - Bethsy Lalrinsangi

Best Love Song artist
Male - C.Sanga
Female - F.Laldinmawii

Best Choir
Bawngkawn bial Zaipawl

Most Popular Song
Phaizawl Lily

Musician
C.Saihmingliana
ZD Zoramthanga

Composer
B. Sangmawia
C.Lalzarmawia
F.Lalthanliana

Thu lama thawh hlawkte
H.Lalthansanga
Biakthansanga Khiangte
J.Lawmsanga
Lalrotluanga
C.Zairemthanga
H.Rothanga
R.Malsawma
F.Saithanga
R. Hmingliana

Hla lama thawh hlawkte
Zosangliana Chhakchhuak
Elis Saidenga
C. Hrangdula
Roliana Ralte
Vanneia Hnamte
T.Lalengzauva
Ramhluna Hnamte
K.Lalnunsiami

Hla thlang tamte
Mambawihi N.Vanlaiphai - 704
Machhana E. Chawngtui - 630
Puii Lungchem - 464
V.Thangtea W.Saizawh - 451
V. Hruaia W.Saizawh - 404

Mi pawisa lo ei ve tum an awm a nih chuan na taka hrem an ni ang - R.Selthuama, MLA

2011-12-08T18:52:00.000+05:30

    Vawiin chawhnu khan Circuit house Conference Hall-ah Joseph Lalhimpuia, MLA, Vice Chairman, HPC & Chairman Dist. Level NLUP Monitoring Committee Lunglei ruahman angin Dist. Level NLUP Implementing Committee Joint Meeting neih ani.
    V.Sapchhunga, IAS, DC, Lunglei chuan Mahima, thahnemngaihna leh ruahmanna anga Jt. Metting neih a nih thu sawiin Line Department te leh Chairman NLUP Implementing Board Aizawl te nena kan harsatna te sawi tlang theih na hun kan nei thei hi a lawmawm takzet a ni, a ti.
    Mahima chuan hetiang a hmun leh Line Department ten kan harsatna kan thlen thei hi a lawmawm hle a, Meetting hi hlawk thei ang bera kan hman ngei ka beisei a ti. Officer te in hah hle a lawmthu a sawi rualin beneficiaries te hnena beisei nei an awm a hriat thu leh pawi a tih takzet thu a sawi.
    Hawla kaihhruai sawrkar hian inthlan dawna Manifesto a a neih a nih ang ngeiin, tunah hian NLUP chu mirethei ten eizawnna ngelnghet an neihna turin chak taka hma lak mek a ni a, Central sawrkar in NLUP atan hian sum tha hnem tak Crore 234 lai min rawn pe. Party thenkhatin Politics khelh nan an hmang thin hi pawi a tih thu a sawi.
    Khuallian R.Selthuama, MLA, Chairman, NLUP Implementing Board Aizawl chuan Lunglei Dist. hi NLUP kalpui kawngah in titha ber a, beisei na pawh kan nei sang hle a, NLUP hmasa kha a buaipui tute kan ni ve a, kan zan kal a vangin engemaw zat chu hlawhtling bawk mahse duhthu a sam lo. Tuna Monitoring leh Implementing ten kan kalpui ang hian kalpui nise a hlawhtling ngei ang ati. NLUP kalphung thar ah hi chuan a hlawhtlinna kan hmu tan tawh a a dawngtu ten an Trade thlan an beih chuan a hlawhtling ngei ngei dawn a ni,” a ti.
    NLUP hmasa a tih takzet a titu te chuan tun thlengin an dinchhuah pui a ni. A dawngtu teah a hlawhtlinna chu thui tak a innghat a, chutih rual chuan Monitoring te in pawimawh hle. In hnuaia Benifeciaries te hmalakna a hmun a in fan chhuah zung zung a ngai a ni. Mi pawisa lo ei ve tum an awm a nih chuan na taka hrem an ni ang, hemi kawngah hian sawrkar pawh a thikthu a chhia. Party mi leh sa emaw sawrkar hna thawk an nih pawhin thil dik lo taka titu te chu hrem lohin an chhuak lovang. Mirethei te chanpual leirem an rah ve theihna Project a ni a; lo lak hek a rem lo a ni a ti.
    Line Deptt. Officer te nang mahni ah kan in ngaht nasa hle a, Monitoring pawh tha taka in tih ngei ka beisei a, kan in hmuhkhawmna hi hlawkpui ngei ila Offcial kan ni emaw Non Official kan ni emaw Missionary rilru pu a mirethei te khaichhuahna kawngah tih tak zetin i thawk ang u. Nangmahniah NLUP hlawhtlinna turin beiseina sang tak kan nei che u in duhsakna ka hlan che u a ni, a ti.
    Zorammuana, Secy. NLUP Implementing Board Aizawl pawhin NLUP a an hmalak mekna te sawilangin line Deptt. ten an harsatna an thlen te pawh hma lakpui dan tur a sawi bawk.

MZP Lungleiin lungawi lo chungchang an enfiah

2011-12-08T17:31:00.000+05:30

     Mizo Zirlai Pawl (MZP) Headquaters Lunglei chuan EMRS staff ten kum 2010 April atanga thawktute hlawhpun dan rual lo lutuka an hriat avanga dt 3-15 Dec 2011 thlenga lungawi lohna lan tira strike an neih mek chu a hmunah kalin EMRS Principal leh Staff te kawmin Zirlaiten harsatna an tawh zel loh nana hmalak ho an duh thu te an sawipui a,chutih rual chuan an lungawi lohna hi MZP Hqrs. Lunglei chuan awm a tihpuiin an hlawh chungchang hi enfiah thuai turin sorkar thuneitute a ngen.
        MZP Hqrs Lunglei chuan EMRS chungchangah hian thil fello deuh awma a hriat avangin Dt 18 Aug 2011 khan Commissoner and Seretary to the Government of Mizoram, Social Welfare Department hnenah zawhna a lo siam tawh nghe nghe a.Chu zawhna chu September 2011 hma ngeia chhang turin MZP chuan a ngen a,a ngenna te ngai pawimawhin Dt 20 Sept 2011 khan Joint Secretary to the Government of Mizoram chuan No.A.14014/18/2007-SWD hmangin a rawn chhang ta a.EMRS staff te hlawh pung chungchangah hian Department in engmah hriat a neih loh thu leh District Commissoner, Lunglei Dist.Level Committee EMRS Chairman ni mek chu Dt 5.9.2011 a lehkha hmanga zawh fiah anih thu leh a chhanna nghah mek anih thu MZP Hqrs Lli chu a rawn hriattir.
        Hetiang anih mek lai leh Dt 8 Dec.2011 a chanchinbu hrang hranga Social Welfare Department Press Release pawhin la ngaihtuah tura tih anih laia hlawh pung in rual khai lo tak hman anih vanga Staff lungawilo ten Strike a nei mek bawk si hi MZP chuan mak a tiin,he hlawh pung in rual khai lo tak hi tu siam leh khawi lai atanga siam nge anih tih hi MZP lunglei chuan Mizoram sawrkar thu neneitu te a zawt tak meuh meuh a, fel lo lai a awm anih chuan siam tha thuai turin a ngen nghal bawk a ni.
       EMRS (TWERIL Society ni thin) hi MZP te leh chhim mipui ten thi leh thau pawlha chhim lam hmasawn nan leh kan chamnpual anih vanga kan sual chhuah ani tih hi theihnghilh lo ila,a chhiat athata mawhphurtu kan ni tih hi chhim mipui te hian i hre thar leh ang u.Tha taka a kal chhoh zel nan leh hmasawnna rahbi thar thlen tir tu anih zel nan MZP Hqrs Lunglei chuan hma a la zel dawn ani.

Hmun hlauhawm ber Category-ah Mizoram a awm

2011-12-07T23:57:00.001+05:30

    Mizorama lirnghing leh thlipui thawh nat theih dan zirchianna report Mizoram Remote Sensing Application Centre (MIRSAC)-in a buatsaih Atlas pahnih vawiin khan Parliamentary Secretary K.S.Thanga’n a tlangzarh.
    Atlas-a an tarlan danin, Mizoram chu lirnghing thlen theihna hmun hlauhawm a ni a, chhim lam aiin hmar lamah lirnghing na tak a thlen a hlauhawm zawk a ni.
    Hetihlai hian Thlipui na takin a nuai theihna hmun hlauhawm ber category-ah Mizoram chu dah a ni a, chhiatrupna thlen theihna a sang hle tih tarlan niin, state chhunga thlipui thawh nat zawng tur erawh a inanglo a ni.
    MIRSAC Scientist te chhinchhiah danin Mizoramah lirnghing na, a tehna, richter scale a 5 chin chunglam tum 7 a thleng tawh a, kum 1994 November ni 25 a Vathuampui khuaa 6.1 a na-in a sawi chu a nghin nasat ber tum a ni.
    MIRSAC Project Director Dr. R.K.Lallianthanga sawi danin, Mizorama Lirnghing leh Thlipui a thlen theih dan chiang zawka hre tur hian Remote Sensing leh GIS thiamna hman a ni a, data hrang hrang rawn a nih bakah WADIA Institute of Himalayan Geology, Dehradun-a Scientist te pawh rawn an ni.

DTP leh Rickshaw thlangtute hnenah NLUP

2011-12-07T23:54:00.000+05:30

    NLUP hnuaia Desktop Publishing leh Auto-Rickshaw thlangtu tanpuina la pek loh te chu, NLUP thawh 2-na sem rualin sum hlawma pek an ni dawn.
    He thu hi Aizawl khawpui huam chhunga NLUP tanpuina dawngtute chungchang vawiin Aizawl-a sawihonaah tarlan a ni a, he sawihonaah hian Aizawl veng tina Village Level NLUP Implementing Committee hotute an tel a, NLUP Implementing Board Secretary Zorammuana’n a kaihruai a ni.
    Meeting-ah hian Aizawl khaw chhunga NLUP tanpuina dawngtu ten hlawhtling zawka an kalpui theih nan an hnathawh tur siam fel dan tur te an rel a, Aizawl khawpui chhungah NLUP dawng tur Cluster 10-a tanpuina dawngtu mi 8,809 zinga ram nei chu mi 418 chauh an nih avangin an thawh tur siamrem ngai a awm thin ni a tarlan a ni a, tun hnuah hnathawh tur thlan chungchangah felfai tha zawka kalpui tura hmalak ni tawh se an ti a ni.
    NLUP tanpuina dawngtute chu an dinhmun kimchang zawka chhinchhiaha, an hna thiam zawng leh eizawnna atana an hman mek te NLUP hnuaia chhawmdawl zui chi an nih leh nih loh te ngaihtuaha hmalak ni se tih an rel a, eizawnna nazawng erawh NLUP hnuaiah khung a rem loh thu inhrilhfiahin, hmuh theih leh endik theih a nih ngei a ngaih thu tarlan a ni bawk.

Mihring zuartu lakah naupang 178 chhanhim

2011-12-07T23:53:00.000+05:30

China Police-te chuan mihring zuara eizawng pawlte lakah naupang 178 an chhanhim. China Public Security Ministry chuan thu chhuah siamin, Police sangnga (5000) ten heng naupang hralh tura rukbo te hi thla hmasa atang khan chhanchhuah hna beihpui an lo thlak tawh tih an sawi a ni.
China-ah hian hmeichhia leh naupang te hi rukbo a, hralh an ni nasa hle a, mi thiam zawk ten a chhan bera an ngaih-a chu, nupa tuak khat in fa pakhat bak neih phal loh a nih leh fa lak khap anih vang bakah,naupang chhawr duh dah atan an duh niin an sawi a, an ram chanchinbu Xinhua-in a tarlan danin, police ten kum 2009 atang khan naupang singkhat leh sang riat leh, hmeichhia sing thum leh sang li rukbo atangin mi sangsarih (7000) chu chhanhim an ni tawh a ni.

MNF Sub.Hqrs.President thar Joseph Lalzawmliana

2011-12-07T00:06:00.000+05:30

    Nimin khan MNF Sub. Hqrs.Lunglei chuan Saikuti Hall-ah General Conference hmangin hruaitu thar an thlang nghal.
    President atan mi pali inchuhna karah Vice President ni lai Joseph Lalzawmliana thlantlin a ni a, an Vote hmuh dan hetiang hi a ni - Joseph Lalzawmliana-340, Lawmawma Tochhawng-296, CS Chawngchhuma-200, H.Thangrenga 133,
    Vice President nih tum mi pathum zingah Adviser F.Lalsawmkima thlan tlin a ni a, an vote hmuh dan hetiang hi a ni.
    F.Lalsawmkima-499, F.Rosangzela 387, Lalruata Khiangte-69,
    Treasurer chuhtu mi 2 an awmin Treasurer ni mek C.Vanlalmuana thlantlin a ni a, an vote hmuh dan hetiang hi a ni- C.Vanlalmuana-490, Hlimthantluanga-465.
    President leh Vice President thlanah Vote thi a awm a, Vote tla zawng zawng 971 a ni.

Hmeithai pitar pawngsuala thah zui a ni

2011-12-07T00:05:00.000+05:30

    Baktawng Venghluna hmeithai kum 66 mi chu pawngsuala thahzui a ni.
    Baktawng Venghlun Dawrkawn venga cheng Rosa Tawnluii chu nizanhmasa dar 8:10 vel khan a chenna inah a fanu in khumah thi a a mu a hmu a, a hrawkah na taka Chempui a zaina hnuhma a awm a, a zaina chempui pawh a mutna lukham bulah hmuh a ni bawk.
    Misual hi Zohmun khua nia insawi, tun hma kum 3 kaltaa Baktawnga mi in awm thin, tun hnai thla khat kalta vela awm thar leh, Zothanpuia kum 25 mi a ni a, Serchhip Police ten an man hnuah nimin zing dar 7:00 vel khan a inpuang a, he hmeithai hi a pawngsual hnuah midang hnena a sawi a hlauh avangin a that zui ta niin a sawi a ni.
    He thil thlengah hian Baktawng mipui rilru a na hle a, Tawni hi a fanu Lalramnghaki te nufa nena cheng, chhungkaw harsa tak an ni a, a fanu hi thimhlimah a pu te inah TV en tura chhuakin, TV en zo a haw leh hnuah a nu chu khumah thiin a hmu ta mai a ni.
    Zothanpuia hi, an ina leng lut ve thin, an chhungkua pawhin an hmelhriat a ni a, hetianga a chet hnu hian Lalramnghaki ina haw tur hi hmuin an ina len a tum thu a hrilh a, amaherawhchu Lalramnghaki chuan a len theih loh thu a a chhan hnuah, ani pawh chu a kalkiang ve mai a, hemi hnua Tawnluii ruang buaipui a nih lai pawh hian an inah current pawhna te siamin, ruang buaipui tute zingah a tel ve ni a sawi a ni.
    Tawnluii ruang hi nimin khan Serchhip Damdawi In, JN Hospital-ah postmortem a nih hnuah nimin tlai vek khan vui liam a ni,
    He thil rapthlak tak thleng avanga Baktawng mipui thinrim chuan tualthattu hmuh tumin Serchhip Police station an pan a, amawherawhchu Police ten Aizawlah an thawnthlak hman avangin thil duhawm lo thleng zui a awm lova ni.

Naupang thah avangin Silchar-ah boruak a sosang

2011-12-06T20:14:00.001+05:30

    Silchar-a Berenga venga cheng naupang kum 10 mi misualin kidnapp a an thah avangin Silchar-ah tualchhung boruak a tha lo hle.
    Sahadat Hussain Mazumdar kum 10 mi ruang hi Link road a awm Dulu Roy a in, inthiarna pindanah nimin khan thia chhar a ni a, mipui thinrim chuan Dulu Roy a In an suasam bakah Sonai road a dawr thenkhat an suasam a, mipui thinrim thelh tur hian CRPF te a hmunah nizan khan an kal nghal.
    Hetihlai hian helai venga chengte hian tualthah duhlohna lantir nan leh Dulu Roy a in suasam anih duhloh entir nan National Highway NO 54 leh Hailakandi kawngpui vawiin khan an dangping a, helai hmuna dawr leh sumdawnna hmun thenkhat pawh an la inkhar a, police ten a hmunah awm chilhin venhimna hna a thawk mek a ni.
    Hetihlai vek hian Silchar Medical College and Hospital a Department of Paediatric a Assistant Professor Dr Bidyut Nath, Karimganj a North Narainpur mi nia rinhlelh misual ten tun pathianni a an kidnapp chu chhuah phutin mi tam takin kawng an zawh a, Security forces ten Hailakandi leh Karimganj ramhnuaiah Doctor Nath a hi an zawng mek.

Rev.Chanchinmawia mahni inthat a nih a ring lo

2011-12-06T20:12:00.002+05:30

    Nimin, December 5 2011 khan R.Lalawia ZNP Sr. Vice President chuan ZNP Workers te hmaah thusawiin, Rev.Chanchinmawia thih chungchangah mahni inthat anih a rin loh thu a sawi.
    Kohhran mipui leh Pol.Party hrang hrangte, MNF a mite ngei pawhin mahni inthat anga sawi hi an pawm lo a ni, a ti.
    R.Lalawia chuan, MNF Party-a hruaitute zinga a awm laiin, Coordination Committee Members - H.Vanlalauva Minister, K.Vanlalauva Minister, R.Khawpuithanga Adviser to Chief Minister leh amah ten Chief Minister Zoramthanga a Office Chamber-ah an hmu a. R.Khawpuithanga’n Rev. Chanchinmawia ziak, “Tirhkoh Paula Chanchin” Presbyterian Kohhran Sande School 2008 a zirtur chu chhut mai a nih tawh tur thu a sawi.
    Chief Minister chuan “Police SIT-in Investigation an zo tawh a, ‘mahni inthat a ni’ an ti a, puan chhuah vat tur a nih chu. Puan a nih chuan, mahni inthat ziak chu kan zir dawn lo vang a, kan zir vaih erawh chuan 2008 MLA inthlannaah MNF chu engmah kan ni lovang” tiin a sawi a ni, a ti. R.Lalawia chuan, “MNF hotu lawk thenkhatte hian Rev Chanchinmawia hi mahni intihlum angin sawi thin mahse, Zoram mipui te thinlung a dam lo va, MNF mi leh sa tam tak rilru pawh a dam lo tih ka hria a ni” a ti bawk.
    Nimina ZNP mithar lawmluh inkhawm hi K.Laltuvela General Secretary chuan a kaihhruai a, Ramngaihawma Republic Veng MNF VCM te pawh lo ni tawh leh a thiante Voters 34 chu Lalduhawma’n chuan a lawmlut. Lalduhawma chuan ZNP in chhung inkhawm kan neih apianga lawmluh tur kan la nei zel theih avangin lawmthu a sawi bawk.

Wladimir Klitschko a inhnukdawk

2011-12-06T00:59:00.000+05:30

World heavyweight champion Wladimir Klitschko chuan a title humhim tura tun Inrinnia Jean-Marc Mormeck nen an inhnek tur chu a kala lungte awm an paih avangin a inhnukdawk. Kum 35-a upa hian a beih theih inring mahse, thurawn a dawn angin loh theih lohin a inhnukdawk ta a ni.

Zaninah Champions League khel leh dâwn

2011-12-06T00:57:00.000+05:30

     Zanin hian UCL group match hnuhnung ber an khel dawn ta a, chak mamawh Chelsea-in Valencia an lo mikhual dawn a, Champions League-a an damkhawchhuahna tura match pawi-mawh tak a nih bakah Andre-Villas Boas tana fiahna lian tham tak a ni.
    Chelsea hian Group E match dangah Belgian club Racing Genk chu 1-1 in an draw tawh a, Bayer Leverkusen lakah 2-1 in an tlawm tawh bawk a, zanina a chak zawk zawk hian last 16 an lut ang a, a chak lo zawk an tla ang.
    Club pahnihte hi Champions League-ah hian vawi 5 an intum tawh a, Chelsea hi vawi 2 chakin vawi 3 an in draw tawh.
    Chelsea hi an match hnuhnung 10-ah vawi 5 lai an tl^wm a, an midfield a that tawk loh avangin striker ten ball tha an hmu thei meuh lo. Villas-Boas tan hian kum upa lam Terry leh David Luiz te chu innghahna tak tak tlak an ni tawh lo va, Sturridge a rawn khelh \hat chhoh deuh avangin beiseina tlem a awm ve thei deuh.
    Valencia lam hian weekend match-ah an captain Roberto Soldado chawlhtir an tum zet a, an chak zo dawn lova a lan avangin hun tawp lamah an luhtir leh a, minute 80-naah Espanyol hnehna goal a rawn khung a ni.
Chak vek tum Arsenal
    Arsenal hi group match-ah chak lo nei miah lova kalin, KO stage an lut tawh a, zanin hian Weng-er chuan chak loh nei lova an kaltluang hi kaltlang-pui a tum.
    Arsenal hian match 5 an khelh tawhah vawi 3 chakin, vawi 2 an draw a, Group F-ah hmahruaitu niin, zanin hian chak lo pawh nise, group leader an ni tawh tho a ni.
Zanina inkhel turte:
Chelsea v Valencia (1:15 Ten Action)
Barcelona v B. Borisov (1:15 Tensports)
Olympiakos v Arsenal (1:15)
Plzen v AC Milan (1:15)
A. Nicosia v Shakhtar Donetsk (1:15)
B. Dortmund v Marseille (1:15)
FC Porto v Zenit (1:15)
Genk v Bayern Leverkusen, (1:15)

Fifa Ballon d'Or three-man shortlist

2011-12-06T00:53:00.000+05:30

     Nizana Fifa Ballon d'Or three-man shortlist tihchhuah takah Lionel Messi, C. Ronaldo leh Xavi-te an lang.
    FIFA World Player of the Year leh France Football's Ballon d'Or suihzawm hnuah nikum khan Fifa Ballon d'Or hi Messi chuan a dawng hmasaber a, suihzawm a nih hmain 2009 leh 2010-ah he lawmman hi a lo dawng tawh a, Barcelona-a a team-mate Xavi hi 2009 leh 2010-ah 3-na a hauh ve ve a, Ronaldo hian 20-08-ah he chawimawina hi lain, 2007 leh 2009-ah 2-na a ni bawk.
    Man. Utd striker Wayne Rooney chu Goal of the Year nominated-ah langin, a lanna hi season hmasaa Man City nen an inkhelh \uma a overhead kick mawi tak vang kha a ni a, ani bakah Messi leh Neymar-te an lang bawk.
    Coach of the Year shortlist-ah Sir Alex Fer-guson, Barca boss Guardialo leh Real boss Mourinho te an lang.
    Lawmman dawngtu turte hi nakum January 9-ah Zurich-ah puanchhuah a ni ang.

MNF Sub.Hqrs.President nih tumte tling thei dinhmunah an ding vek

2011-12-06T00:13:00.002+05:30

    Vawiin hian MNF Sub. Hqrs.Lunglei hruaitu thlan a ni dawn ta.Dar 10:30 a\angin Gen.Conf. hman a ni anga, chawhnu lamah Hqrs. atanga lo kalten hruaitu thar an thlanpui dawn a ni.
    President atan hian Pre-sident ni lai Lawmawma Tochhawng, President hlui CS Chawngchhuma leh H.Tha-ngrenga te bakah tuna Vice President ni mek Joseph Lalzawmliana te an inkhing dawn a, Vice President-ah F.Lalsawmkima, F.Rosangzela leh Lalruata Khiangte te inkhingin Treasurer-ah C. Vanlalmuana leh Hlimthan-tluanga te an inkhing bawk dawn a ni.
    Hqrs. atangin Lalchamliana Ex.Speaker ho vin an lo kal a, inthlannaah hian Ramchhanpuia (Papuia) Gen. Hqrs.Gen.Secretary chu RO a ni ang.
    President nih tumte hian tlin an inring vek a, MNF mi leh sate pawhin tling thei dinhmuna an din vek thu an sawi hlawm.